Эфирт – Хальмг радио

07-05-2024, 12:16 | Общество, Таңһчин зәңгс, Сойл

Эндр радиозалһлдана көдләчнр сән өдрән темдглҗәнә. Әрәсән орн-нутгт олн радиостанц көдлнә, тедн дунд Хальмгин радион көдләчнр олн җилдән эврәннь соңсачнрин төлә соньн соңсхврмудан белднә.

Дөчн шаху җилдән Манҗин Савр радион режиссер болҗ көдлҗ йовна. Эндр энүнә неринь мана таңһчд олн-әмтн меднә.
Эндр таңһчин радиод көдлдг улсин дунд дамшлтта гиснь Савр Джоржаевич болна. Олн җилмүдин эргцд орн-нутгин хүврлтс дахад, радион көдлмш бас сольгдад, делгрәд йовла. Цуг эн тоотыг Манҗин Савр эврә нүдәрн үзҗ, радион делгрлтд ик тәвцән орулсн көдләч мөн. Энүнә келсәр, бәәдл-җирһлнь Хальмгин радиола залһлдата болснднь эн хөвдән ханна. Олн җилмүдин туршарт мана таңһчин нертә бичәчнрлә, артистнрлә болн талдан үүлдәчнрлә харһад, күүндәд, соңсхврмудан белдсмн. Эндр болхла, эннь Хальмгин радион алтн көрңд орсн болдг.
Эндр Хальмгин радиод арвн шаху күн седклән тәвҗ көдлнә. Тедн дунд Шурңһа Цаһан, Җамбинә Галина, Мендгалин Виктория мөн. Эднлә хамдан баахн көдләчнр Ментән Ольга, Манҗин Байр, Ширипә Бадм, Емелән Дольган, Арлтана Дмитрий, Үлмҗин Алдр нег һазра улсин төлә олн зүсн төрмүдәр соньн һарцсан белднә. Радион сән өдрлә эдн ах үйин үүрмүдән бас бүләнәр тодлна. Пеедрә Дорҗ, Романа Антон, Болдра Инҗр, Ченкалин Борис, Җимбин Татьяна, Дорҗин Нонна, Шуринә Зоя болн талдан улсин нерд Хальмгин радион тууҗд орсмн. Ах үүрмүдин үлгүрәр олн җилдән Морчука Мария, Сипән Любовь, Күкән Нина, Владимир Малич болн нань чигн дамшлтта көдләчнр кергинь цааранднь делгрүләд йовсмн.
Хальмгин радион көдләчнриг әрүн седкләсн йөрәҗәнәвидн, соньн, өвәрц соңсхврмудан цааранднь белдҗ, соңсачнран байрлулҗ йовтн!
КАРСАНА Евгения
Зургт: Хальмг радион көдләчнр

Видео