«Өөрднр» Крымд билгән үзүлҗәнә

«Өөрднр» хальмг бииһин театр Крымин һазрар концертс үзүлҗәнә. Феодосия курортн ик балһснд хальмг биичнр үзүлсн концерт әмтнд таасгдв. Ялта балһснд чигн әмтн хальмг бииһин эрдмлә таньлдв.

Хөн сарин 12-т «Өөрднр» Севастополь балһснд билг-эрдмән үзүлв. Нер туурсн хальмг коллектив өдр болһн концертс әмтнд белглв. Әрәсән меҗәд шинәс орҗ ирсн ончта цагас авн арвн җил болҗах өөнән Крымин әмтн ик өргмҗтәһәр темдглҗәнә. Байрта эн өдрмүдт ик орн-нутгин олн келн-улсин билг-эрдмлә таньлдлһн эднд нег үлү байрта болҗана. Зовлңта чигн, байрта чигн цагт Әрәсәлә нег җирһләр бәәхәр тиигҗ Крымин әмтн медҗ авчана.
Хөн сарин 13-д Красноперекопское балһснд хальмг артистнр бииһин эрдмәрн әмтиг байрлулв. Симферополь балһснд хальмг биичнриг эндр тосчана. Хөн сарин 15-д Евпаторин әмтн хальмг көгҗмин айст бахтҗ, хальмг бииг хәләхмн. Хөн сарин 16-д Керчь балһснд «Өөрднр» бииһин театр гастрольмудан төгсәхмн.
Иигәд хөн сарин байрин өдрмүдлә «Өөрднр» бииһин театрин артистнр Крымин әмтнд ик өргмҗ үүдәв. «Бидн - Әрәсә» гидг шаңһа төсвин бүрдәһәчнрин тоолврар, орн-нутгин олн-әмтиг регионмудын хореографическ болн үүдәгч коллективсин билг-эрдмлә таньлдуллһн ик чинртә болҗана. Сойлын дөңгәр улсин хоорндк залһлдан батрна, кен-негнәннь ду-бииһин эрдмлә таньлдад, әмтн келн-улс болһна заң-авциг медҗ авна.
«Өөрднр» бииһин театр Хальмг сойлын элчнр болад, иим чинртә концертс үзүлв. Хальмг бииһин эрдмиг олн дунд цуцрлтан уга тархаҗ йовх бииһин эн коллективиг орн-нутгт сән меднә. Давсн җилд «Өөрднр» Уралын болн Сиврин балһсдар йовад, хальмг бииһин ке-сәәхниг олн келн-улст күргҗ үзүлсмн. «Өөрднр» бииһин театрин артистнриг сойлын ик чинртә керг-үүлдврмүдт, хәләврмүдт орлцҗ йовхинь бидн хара биш үзнәвидн. Хальмгин билгтә артистнр орн-нутгт болдг ик чинртә керг-үүлдврмүдт эрк биш орлцна.
Крымин балһсдар үзүлсн театрин концертс сойлын җирһлд ик чинртә йовдл болв. «Мана коллектив Крым тоха арлын долан балһснд одв, - гиҗ театрин һардач болн балетмейстер Владимир Надбитов келнә. - Кезәңк цагас авн улсин җирһлд хадһлгдсн олн би Крымин әмтнд сергмҗ үүдәв. Хальмг көгҗм, өвәрц ду-би, сәәхн хувцн әмтнә соньмслт олна. Театрин артистнрин билг-эрдмиг Крымин хәләһәчнр өөдән үнлснь маднд ик урмд өгчәнә. «Бидн - Әрәсә!» гидг шаңһа төсвд орлцлһн маднд йир сән йовдл болҗана. РОСКОНЦЕРТ-д болн Әрәсән сойлын министерствд коллективин нерн деерәс ик ханлтан медүлҗәнәв. Эн төсвин нилчәр цуг орн-нутгар йовҗ билг-эрдмән үзүлх арһ мана коллективд учрв».
«Өөрднр» Хальмг Таңһчин бииһин театр шаңһа көтлврт орлцад, хальмг бииг цуг орн-нутгин әмтнд үзүлҗ йовна.
ҖИРҺЛИН Кермн