Хаврин теегт нерәдсн байр

14-05-2024, 16:04 | Общество, Таңһчин зәңгс, Сурєуль-эрдм

Җил болһн хаврар мана теегт бамб цецгүдт нерәдсн ик наадм болна. Мөрн сарин туршарт эн байрт нерәдсн олн керг-үүлдврмүд давулгдв. Элст балһсна 4-ч тойгта сурһульд 2-ч «а» классин сурһульчнр хальмг келнә багш Т.М.Нимеевала (зургт) бас эн сәәхн хаврин байрт нерәдсн соньн нәр давулв.

Хаврин теегт аңгуд олн бәәнә. Зурмн болхла, Цаһан Сарла ичәнәсн һарад, ишкрәд, хальмг тееглә мендләд, хавр аашна! - гиж хәәкрнә. Тегәд чигн эн байрин һол дүр Зурмн болв. Зурмна иньгүд – теегин аңгуд ирҗ, энүг һарсн өдрләнь йөрәҗ, белг белглв. Белгнь ямаран гихлә, эннь шүлгүд, йөрәлмүд, үлгүрмүд, «Җаңһр» дуулврин тасрха болв.
Байрин эклцд сурһульчнр Удан Вадим болн Утән Нина хаврин туск күүндвр тогтав. Чамд хавр таасгдну? Юңгад? Тег хаврт ямаран болна? гидг сурврмудт бичкдүд хәрү өгв. Дәкәд Зурмн (Гадыша Данир) гүүҗ ирәд: «Хальмг тег, мини тег! Хальмг тег сәәхн, эңкр тег! Эндр мини һарсн өдр, мини иньгүд ирх зөвтә», – гиҗ байртаһар зәңглв. Филиппа Данил болн Өлзәтин Злата зурмна тускар күүндвр тогтав. Эн ямр аң? Юуһар хот кенә? Кезә ичәнәсн һарна? Юңгад энүг өвәрц аң гинә? – гидг сурврмудт эдн хәрү өгв.
Түрүн гиич Ялмн (Манҗин Данзн) тогляд ирнә. Эн үүрән йөрәһәд, «Җаңһрин» тасрха келҗ белглв. Дәкәд хурдн көлтә, соньн хамрта бичкн Цагда (Абушан Аюр), теегин бор Туула (Балакан Баир), шар Арат (Каткан Арина), зөрмг Чон (Филиппа Данил), шовһр җидтә Зара (Савкан Илья), хаврин зәңгч Харада (Өлзәтин Злата), теңгрин эзн Хан һәрд (Максима Лев), ут көлтә Тоһрун (Алексән Давид) Көглтин Даван, Эрнҗәнә Константинә, Шугран Веран, Санҗин Николайин хаврин туск шүлгүд чееҗәр умшҗ өгв. Боован Влад сәәхн йөрәл келәд, цугтаһинь байрлулв.
Сурһульчнр цугтан ямр аңгин дүр үзүлҗәдг болну, толһа деерән тер аңгин зург титм кеһәд зүүцхәҗ. Дәкәд багшнь Нимән Тамара «Теегин аңгудын дүр үзүлсн күүкд, тер аңгин тускар ахрар келҗ өгхмн, гив. Зурмнас авн экләд, цугтан аңгин тускар келҗ өгв. Дәкәд багшнь аңгудын туск тәәлвртә туульс келв, күүкд тәәлвринь олв.
Байран ашлад, Тамара Манджиевна эврән бичсн «Хаврин тег» гидг шүлг умшҗ өгв. Эн керг-үүлдвр бичкдүдиг теегин аңгудла таньлдулсн деерән һазр- усан әрүнәр хадһлх кергтә гисн сурһмҗта болв.

БИМБИРӘ Светлана, Элст балһсна 4-ч тойгта сурһулин методическ әңгин һардач

Видео