Экиннь үлгүрәр социальн көдләч болв

Сарпан района Шарнут селәнә бәәрн улс бер Манҗин Александраг цуһар күндлҗ өр-өвч седклтә болн седвәртә күүкд күн гиҗ буульна. Бийнь эн хам-хоша бәәдг Уманцево селәнд өсәд-боссмн, шарнута көвүн Манҗин Санлд хәрд һарад, энд иҗлдв. Сүл арвн негн җилин эргцд Александра Петровна социальн көдләч болад, зурһан медәтиг килмҗлҗ хәләнә.
- Мини эк Мергән Валентина Уманцево селәнд 15 һар җилдән социальн көдләч болҗ көдлҗ йовла. Би бичкнәсн авн экдән нөкд болад, социальн көдләч ямаран көдлмш күцәдгиг сәәнәр меднәв. Тер цагт селәнд өдмг хулдҗ авхин төлә удан цагт чеерүдт зогсх кергтә бәәсмн. Экиннь ормд чеерүд авад, өөр-шидр үүрмүдтәһән наачаһад гүүҗ ирәд, өдмг хулдҗ авдг биләв. Медәтнрин герин һаза хог-бог ахулад, сад-һарудт цецгүд, темс урһаһад бас дөңгән күргҗ, эктәһән хамдан сул цаган давулдг биләв. Тегәд социальн көдләч медәтнрт ямаран туслмҗ күргҗ, ямаран даалһвр күцәдгиг медәд, Шарнут селәнд тиим көдлмшт кү хәәҗәхиг соңсад күч-көлснә хаалһан энд эклсн биләв. Тер өдрәс авн арвн негн җил давв. Көдлмшм нанд таасгдна, һанцарн бәәдг болн гемтә-шалтгта улст нөкд болнав, – гиҗ Александра Петровна келнә.
Ода энүнә хәләврт зурһан медәт бәәнә. Эднә күүкднь өрк-бүләрн таңһчин меҗә һатц көдлҗ йовна, тегәд эдн цуһар ода һанцарн бәәдг улс болна. Най һарсн Евдокия Бембеевна Мутеева, Нина Васильевна Букина, Кука Санджиевна Мучкаева, Любовь Дорджиевна Оконова түрүн өдрәс авн энүнә хәләврт бәәнә, тегәд эдн Александра бериг һарлдсн үрнлә әдл тоолна. «Чама угаһар бидн бәәҗ чадшговидн. Мадниг бичә үлдә», – гиҗ медәтнр энүнд келнә. Александра Петровна күн болһнд санань зовҗ, сөөднь чигн җиңнүлхләнь адһна, кергтә болхла өдрт кесг дәкҗ мендинь медхәр орҗ ирнә. Социальн көдләчәр экләд көдлхднь отхн Катя күүкнь хө мөстә билә, тегәд зәрмдән тернь экән дахад ирдг бәәсмн. Ода күүкнь 7-ч класст сурна, медәтнрлә харһхларн эн тедниг теврәд, үмсәд байрлна. Хамдан сурчадг үүрмүдтәһән эн экдән бас дөң болҗ, герин һаза цевр-цер таал тогтаҗ, нань талдан амр көдлмш кенә.
Манҗин Александра бийнь маши зална, тегәд эн медәтнрән суулһад, эмчд, үс кирһәчд, лавкд авч одна. Гертән бәәдг медәтнр хамдан Садовое эс гиҗ хам-хоша бәәдг Аһшин мүҗд одсна хөөн сергнә, бичкн зуульчллһн эднд ик байр үүдәнә. Селәнә сойлын герт ямр нег концерт, нәр болхла, эн ээҗнриг бас машиһәрн күргнә. Дәкәд эдн селәнә паркд амрхдан дурта. Шарнут селәнә эмнлһнд эмч болн медицинск хойр эгч көдлнә. Медәтнр тас уга болхла, Александра Петровна тедниг дуудад, кергтә эминь хулдҗ авч ирнә.
Йирин Манҗин Александра седвәртә, үгтә-күүртә, шулун-шудрмг бер болна. Давсн җилд Шарнут селәнә паркд сән кец-таал тогталһна кергт ик тәвцән орулсмн, тегәд Манҗин Александра Әрәсән тосхлтын болн ЖКХ-н министр Ирек Файзуллинә Ханлтын бичгәр ачлгдв. Ода паркд бичкдүд нааддг орм, цогц-махмудан батруллһна талвң болн сул цаган сергмҗтәһәр давулхин төлә сән таал бәәнә. Бәәрн арһлач Дорҗин Евгенийин седвәрәр, дөң-тусар энд суврһн босхгдв. Эн өдрмүдт селәнә бәәрн улс олн зүсн цецгүд суулһҗ паркиг кеерүлҗәнә, Александра бер бас эн кергт орлцна.
- Көгшн улс бичкдүдлә әдл, эдн бичкн юмнд зовад, гейүрәд, дарунь ө-һундл чигн учрна. Күн болһн эврә авг-бәрцтә, заңта, хәләцтә, тегәд кен-негнднь урмд өгх кергтә болна. «Виртуальный туризм», «Компьютерная грамотность» болн «Эрүл-мендин сурһуль» гидг һурвн көтлвр үүдәһәд, медәтнрлә соньн кевәр цаган давулнавидн. Үлгүрнь, бидн хамдан компьютерәр дамҗад, нарт-делкәд бәәдг ке-сәәхн һазр һәәхч, ямр нег соньн йовдлын тускар умшнавидн. Цогц-махмудан батрулад, олн зүсн гемәс саглуллһна тускар медҗ авнавидн, цә ууһад ю-бис күүнднәвидн. Зәрм медәтнр өдгә цага эв-арһ олзлдгиг дасад, үүрмүдтәһән болн элгн-садтаһан залһлда бәрнә, – гиҗ Александра келнә.
Пандемий болсн цагт Манҗин Александра медәтнрлә хамдан таңһчин социальн делгрлтин, күч-көлснә болн көдлмшәр тетклһнә марһанд орлцад, ик күцәмҗ бәрв. Нертә зурачнрин дүрмүдиг дураһад зург цокх кергтә бәәсмн, тегәд Роман Васильевич Манджиев 1-ч орм, Любовь Дорджиевна Оконова 2-ч орм тер марһанд бәрәд, үнтә белгүдәр ачлгдв. Мана медәтнрт таңһчин марһанд диилвр бәрснь ик байрта йовдл болв.
Манҗин Александра Санл авальтаһан хөрн һар җилдән хамдан бәәнә, эдн һурвн үртә. Заяна болн Гиләнә күүкднь-оютнр, Элстд сурчана. Амрлһндан ирхләрн экдән нөкд болна.
ДООҖАН Наталья
ЗУРГТ: социальн көдләч Манҗин Александра медәт Евдокия Бембеевна Мутееван геринь ахулҗах кем