Сәәнәр көдлҗәхнь ачлгдв

14-05-2024, 16:57 | Общество, Таңһчин зәңгс, Эрўл-менд харлһн

П.Жемчуевин нертә таңһчин эмнлһнд медицинск эгчин нарт-делкән Өдрт нерәдгдсн байрин хург болв. Терүнд Хальмг Таңһчин Улсин Хуралын (Парламентин) депутат Мацга Татьяна, таңһчин эрүл-менд харлһна министр Саран Булат, таңһчин эрүл-менд харлһна көдләчнрин профсоюзин ахлач Манҗика Евгения, таңһчин Олна палатын Ахлач Мучан Батыр орлцв. Таңһчин эмнлһнд олн җилдән көдлсн, эрүл-менд харлһна делгрлтд ик тәвцән орулсн улс байрин хургин күндтә гиичнр болҗ орлцснь темдгтә болв.
Эндр таңһчин эмнлһнд 389 медицинск эгч болн фельдшер көдлҗәнә, теднәснь 22 күн Әрәсән эрүл-менд харлһна йилһән сән көдләчин өөдән нер зүүнә, 6 күн Хальмг Таңһчин эрүл-менд харлһна ачта көдләч болна. Эдн күч-көлснә хаалһан эклҗәдг баһчудла байн дамшлтарн хувалцҗ, сүв-селвгән өгч, эрдмән сәәнәр медҗ авхд дөң-тусан күргнә.
Байрин хургт орлцсн гиичнр дунд медицинск көдләчнрин кеҗ-күцәҗәдг көдлмшиг өөдәнәр үнләд, эдн гемтә улст эдгҗ сән эмнлһ авхд килмҗән тусхаҗ үнн-чик седклтәһәр көдлҗәхиг темдглв. Хургин йовудт сән өдрлә ирлцҗ 25 көдләчин ач-тус темдглгдв. Таңһчин эмнлһнә ах медицинск эгч Лейла Могушковад «Хальмг Таңһчин эрүл-менд харлһна делгрлтд ач-тусан күргсн төлә» гидг темдг бәрүлҗ өггдв.
Сән авъяст тохрсар сән өдр угтҗ таңһчин эмнлһнә әңгүд дунд марһан давулгдна. Терүнә йовудт иткл цаасдыг дигтә-даратаһар белдлһнә, эмиг чикәр хадһллһна болн нань чигн талдан неквр күцәдг, күцәмҗтәһәр үүлддг әңгүд йилһҗ авгдна. Марһанд дииләчнрин тоод гемтә улсиг орулҗ авлһна болн эндокринологин әңгүд орв. Тер мет нейрохирургийин, гинекологин, урологин болн гастроэнтерологин әңгүд бас темдглгдв.
БАТАН Наталья

Видео