Нөкцлтин халхар

Шидр Хальмг Таңһчин залврин Ахлачин дарук–таңһчин социальн делгрлтин, күч-көлснә болн көдлмшәр тетклһнә министр Өлзәтин Маринан даалһврар Луганск Улсин Республикин Антрацитовск медәтнрин болн гемтә-шалтгта улсин гер-интернатд дөң күрггдв. Ода эн бүрдәцд 220 күн бәәнә.
- Харм төрхд, бидн гер-интернат күртл күрч чадсн угавидн, тегәд Антрацит балһсна талвңд бүрдәцин һардврла харһад, авч ирсн белгүдән өгвидн. Ода интернат күртл хаалһин ясврин көдлмш кегдҗәнә, тегәд тиигәрән күрдг арһ уга болв. Бидн киитрүлдг кергсл, хот-хол, медәтнриг асрлһна төлә керглгдх нань чигн эд-тавр күргҗ өгвидн, – гиҗ медәтнрин болн гемтә-шалтгта улсин Элстин гер-интернатын һардач Каманҗан Александр келв.
Антрацитовск гер-интернатын һарвдр болн тенд бәәдг медәтнр буйнч седклин керг-үүлдврин халхар белг өгүлсн улст ик ханлтан өргв.
БАТАН Сәәхлә
ЗУРГТ: Антрацит балһснд болсн харһлтын кем