Әрәсән баһчудын хүрмин наадм

16-05-2024, 15:10 | Общество, Таңһчин зәңгс, Зіњг

«Әрәсә» гидг һәәхүл нидн үкр сарин 4-д секгдәд, орн-нутгин күцәмҗин тускар олнд медүлҗ, сойлын, сурһулин болн нань чигн соньн керг-үүлдвр бүрдәҗ давулҗана. Һәәхүлд Әрәсән 89 регион, федеральн ведомствс болн олна бүрдәцс орлцҗана, ут тоодан 12 сай күн нааран ирсн бәәнә. Эн җил Әрәсән Президент Владимир Путинә шиидврәс иштә мана орн-нутгт өрк-бүлин Җил зарлгдв. «Әрәсә» гидг һәәхүлд өрк-бүлин Җил секлһнә байрин керг-үүлдвр энд болснь орта болв. Өрк-бүлин Җилд нерәдгдсн керг-үүлдврмүд һәәхүлд цааранднь чигн болхмн.

Шидр һәәхүлд хүрмин Цугәрәсән наадм болв. Терүнд орн-нутгин булң болһнас ирсн баһчуд һар цаас кев. Ут тоодан 150 баахн өрк-бүл наадмд орлцв, Москва балһсна ЗАГС-ин заллтын көдләчнр эднә һар цаасна байрин керг-үүлдвр күцәв. Хотл балһсна ЗАГС-ин көдләчнр 2019 җиләс авн Москван мэрин «Хөв-кишгин шин хайг» гидг төсвин медлд сәәхн ормд һар цаас кенә. Эн җил «Әрәсә» гидг һәәхүлд терүг давулх шиидвр авгдсмн. Баһчуд олн келн-улсин хүрмин авъясла таньлдулҗ, яһҗ белдвр кедгиг, нәәрән давулдгиг, ямаран хот-хоолар гиичнрән тоодгиг үзүлв, олн зүсн марһаст орлцад, соньн даалһвр күцәв. Хальмг Таңһчас ик наадмд Даниил Лещенко болн Баина Тугусова, Арслан Хинеев болн Гилән Эрднеева орлцад, байрин нәәрт хальмг улсин хүрмин авъясла таньлдулв. Хүрмин наадм долан хонгтан болв, эн өдрмүдин туршарт олн зүсн мастер-класс болв, һар цаас кесн баһчуд бииһин болн шог дууна марһанд орлцв, «Орс хүрм» һәәхүл хәләв.
Бидн Даниил Лещенкола болн Баина Тугусовала күүндәд, бийиннь болн наадмин тускар келҗ өгхиг сурвидн. Эдн хөн сарин 12-т һар цаас кеһәд, наадм секлһнә байрт орлцв. Темдглхәс, баһчуд хальмг хувц өмсәд кеерснь олна оньг авлв, төв һарцсин седкүлчнр эднә тускар зәңгллһнә соңсхврмудт үзүлв. Даниил Т.Хахлынован нертә медицинск колледжд сурчана, Баина болхла Б.Б.Городовиковин нертә Хальмг ик сурһулин оютн болна. Баһчуд Элст балһснд өсәд-боссмн, дөрвн җил хооран таньлдад, нег-негнәннь седкл медҗ өркән өндәлһхәр шиидв.
- Бидн хүрмин Цугәрәсән наадмд орлцсндан байрта бәәнәвидн. Мана ик орн-нутгин кесг һазрас баһчуд ирәд, хамдан һар цаас кев. Маднд «Әрәсән зүркн» гидг өрк-бүлин һулмтын һал өгв. Терүг өрк-бүлин Җил секлһнә байрин ик хургт Әрәсән Президент Владимир Путин шатасмн. Бидн кесг регионас ирсн баһчудла таньлдад, өврмҗтә болн ончта наадмд орлцад хәрҗ ирвидн. Мана орн-нутгин хотл балһснд һар цаасан кеснь мана өрк-бүлин тууҗин соньн халх болхнь лавта. Бидн Хальмг Таңһчин һәәхүлд одад, манахсла харһвидн. Медицинск колледжин һардач Манҗин Кермн мана өрк-бүлд белг бәрүлҗ өгв, – гиҗ баһчуд маднла тоолврарн хувалцв.
Маңһдур, хөн сарин 17-д, Арслң Хинеев болн Гилән Эрднеева бас Москва балһснд һар цаас кеһәд, хүрмин наадмд орлцхмн. Өрк-бүлән өндәлһсн баһчудын җирһл хөвтә-кишгтә болтха, гиҗ дурдҗанавидн. «Әрәсән зүркн» гидг өрк-бүлин һулмтын һал эднә дурн седклиг хадһлҗ, хамдан олн җилдән ниитә бәәхд туслтха.

ДООҖАН Наталья
ЗУРГТ: өркән өндәлһсн
Даниил Лещенко болн Баина Тугусова
Әрәсән баһчудын хүрмин наадм
Әрәсән баһчудын хүрмин наадм

Видео