Луганск Улсин Республикд дөңгән күргҗәнә

Нидн батлсн бооца күцәлһнә йовудт мана таңһчин бүрдәцс Луганск Улсин Республикин Антрацитовск района иргнмүдт дөңгән цаарандан күргҗәнә. Тер бүрдәцсин дунд Хальмг Таңһчин мал эмнлһнә Заллтыг заах кергтә. Эн көдлмшин тускар шидр болсн брифингин йовудт Заллтын һардач Санҗин Виктор келҗ өгв.
– Мана орн-нутгин олн халхсин бүрдәцс зәңгллһнә негдсн тоод орх зөвтә. Өдгә цагт тиим көдлмш ЛНР-т күцәгдҗәнә. 2026 җил күртл цуг регионмуд терүнд орхмн, – гиҗ Санҗин Виктор темдглв.
Таңһчин мал эмнлһнә Заллтын мергҗлтнр Антрацитовск района үүрмүдлә бат залһлда бәрнә. Нидн бар сард нег һазра мана мергҗлтнр тиигәрән одҗ, олн халхсар нөкцлтхәр үгцсн билә. Тиигхд селәнә эдл-ахун болн мал эмнлһнә халхар дөң болхар шиидвр бас батлгдла. Хөөннь таңһчин мал эмнлһнә Заллтын көдләчнр алс-зәәһин эв-арһар зәңгллһнә тоод орлцлһна тускар һурвн селвлцә давулв. Тер мет телефоһар залһлда бәрҗ, Заллтын мергҗлтнр Антрацитовск района көдләчнрт даңгин селвгән өгнә. Цуг эн көдлмш зәңгллһнә тоод ордг «Меркурий болн «Веста» көтлврин эв-арһар давулгдна. Селәнә эдл-ахун арһлачнр кеҗ һарһдг эд-тавр, махна болн үснә зүүтә хот-хол эн көтлврәр дамҗад шинҗлгднә, гиҗ темдглх кергтә.
Терүнәс нань таңһчин малын эмчнр мөчн сард ЛНР таал йовҗ, селәнә эдл-ахун бүрдәцст сән таал тогтахин туст ветеринарн шишлң керг-үүлдврмүд давулхар зуралҗана, гиҗ Санҗин Виктор товчлв.
ОЛЬДАН Цаһан