Селән һазрт көдлдг улс цуглрв

Шидр Москва балһснд ВДНХ-д «Әрәсә» гидг нарт-делкән һәәхүлин талвңд «Селән һазрт көдлдг улс» гидг Цугәрәсән хург болв. Эн керг-үүлдвр Федерацин Хүүвин седвәрәр бүрдәгдв. Мана ик орн-нутгин регион болһнас ирсн селәнә улс эн ик хургт цуглрҗ, эдниг үүмүлҗәдг төрмүдәр, ухан-тоолврарн хувалцв. Хальмг Таңһчас терүнд Хар Һазра района һардврин селәнә эдл-ахун әңгин һардач Атхан Цаһан, Сарпан района һардврин социальн-экономическ делгрлтин әңгин мергҗлт Сергей Бондарь болн Баһ Дөрвдә медәтнрин болн шалтгта улсин гер-интернатын һардач Манҗин Людмила эн хургт орлцв.
Ик хургиг Федерацин Хүүвин Ахлачин негдгч дарук Андрей Яцкин нүр үгәр секәд, Әрәсән Президент Владимир Путин селән һазрт бәәдг улсин җирһлин таал ясруллһна болн чинринь өөдлүллһнә төрмүдт оньган тусхаҗана гив. «Селән һазрт бәәдг улс сән чинртә медицинск дөң авх, сурһуль сурх, спортар соньмсх, билг-эрдмән делгрүлх зөвтә. Келн-улсин төсвсин болн шаңһа көтлврмүдин медлд селәдт эрүл-менд харлһна, сурһуль-эрдмин, сойлын болн спортивн шин бәәрн тосхгдҗана. Федерацин Хүүв «Селән һазрин делгрлт» гидг көтлврт немр керг-үүлдврмүд оруллһна көдлмш күцәҗәнә», гиҗ дааврта һардач үгдән темдглв.
Түрүн болҗ давулгдсн ик хургт Федерацин Хүүвин комитетин ахлач Александр Двойных, социальн политикин комитетин ахлач Елена Перминова, сенатормуд, РФ-н селәнә эдл-ахун болн талдан министерствсин элчнр орлцад, селәнә эдл-ахун, эрүл-менд харлһна, баһчудын, зуульчллһ делгрүллһнә төрмүдәр ухан-тоолврарн хувалцв.
- Хургт орлцачнрин төлә тавн талвң үүлдв, терүнд орлцачнр соньмсулҗах төрмүдәр сурвр өгв, сүв-селвгән орулв. Харһлтд орлцсн министерствсин элчнр босхгдсн төрмүдәр цәәлһвр өгв, тегәд күүндвр туста болв. Эрүл-менд харлһна төрәр болсн күүндврт селәнә һазрт үүлддг эмнлһст эмчнр болн дунд медицинск көдләчнр кергтә болҗахин туск, эднә җалв өөдлүллһнә, баһчудыг урмдуллһна төрмүд босхгдв. Харһлтд орлцачнр «Земск эмч/фельдшер» гидг көтлврин тускар келв. Эн көтлвр 2012 җиләс авн күцәгдҗәнә, терүнд ут тоодан 50 миңһн күн орлцв. Ингушетин нег селәнд көдлдг баахн эмч эн көтлврт сольвр орулх кергтә гисн селвг орулв. Күүндврт орлцачнр бас талдан төрмүд босхв, эрүл-менд харлһна министерствин элчнр цугинь тодлҗ авад, дөң-тусан күргх болв, – гиҗ Людмила Александровна келв.
Эн хург ВДНХ-д болсн учрар цуһар «Әрәсә» гидг нарт-делкән һәәхүлд орлцв. Манҗин Людмилан келсәр, эн Хальмг Таңһчин һәәхүлд одад, Үстин района болн Т.Хахлынован нертә медицинск колледжин көтлвр хәләв. Мана таңһчин һәәхүл олн-әмтнә оньг авлҗ, ду-бииһәрн өврүлнә гиҗ эн темдглв.
Федерацин Хүүвд Хальмг Таңһчин Улсин Хуралын (Парламентин) элч Байир Путеев мана делегацла харһад, эднлә олн төрәр күүндснь бас тодлгдв гиҗ Людмила Александровна хувалцв. Байир Эдуардович Федерацин Хүүвд, ахр экскурсь давулв. Эдн селән һазрт көдлдг улсин Хургин, көдлмшин болн бәәдл-җирһлин тускар күүндв. «Харһлт үр-иньглгч таалд болв, Байир Эдуардович мадниг үүмүлҗәдг төрмүдәр соньмсв, мана социальн бүрдәцд медәтнр ямаран таалд бәәхин, ямаран төрмүд хаһлх кергтә болҗахин тускар келснә дару сенатор маднд дөң-тусан күргх болв», – гиҗ Людмила Александровна байрлв.
ДООҖАН Наталья
ЗУРГТ: Федерацин Хүүвд Хальмг Таңһчин Улсин Хуралын (Парламентин) элч Байир Путеев мана делегацла харһв