Әмтнә сә хәәгч шин закадын седвәр татв

23-05-2024, 16:12 | Общество, Таңһчин зәңгс, Зіњг

Урҗ өдр Элстд Әрәсән Өмн үзгин парламентск ассоциацин (ЮРПА) ик хург болв, терүнд 11 субъектин болн Абхазь Республикин Улсин Хургин депутатнр орлцв. Давсн җилд хулһн сард ЮРПА-н туг Хальмг Таңһчд бәрүлҗ өггдәд, Элстд дарани сүүр давулх зөв өггдсмн.
Тер өдрин өрүһәр Б.Б.Городовиковин нертә Хальмгин ик сурһулин улд комиссьмүдин болн комитетмүдин сүүр болв. Оютнр күндтә гиичнриг байртаһар тосад, билг-эрдмән үзүлв, сурһулин болн олна үүлдврин туст бәрсн күцәмҗин тускар цәәлһҗ келв. Үдин хөөн ЮРПА-н хург болв. Сүүриг Хальмг Таңһчин Улсин Хуралын (Парламентин) Ахлач Артем Михайлов нүр үгәр секәд, Әрәсән Өмн үзгин парламентск ассоциацин хург мана таңһчд урднь давулгдсинь зааһад, Элстд ассоциацин 40-ч хург болҗахнь ончта йовдл мөн, бидн хамдан харһад, чинртә төрмүдәр ухан-тоолврарн хувалцҗ, әмтнә җирһл ясрулхин төлә кесг седвәр татад, Орн-нутгин Хүүвин, Әрәсән залврин, күцәгч йосна шаңһа бүрдәцст сүв-селвг орулҗанавидн. Мана нөкцлт делгрәд йовтха, хамцу көдлмш күцәмҗтә болтха», гиҗ Артем Васильевич йөрәҗ келв.
Арвн җил хооран хөн сарин 21-д Крым Республикин Хүүв бүрдәгдсмн, тегәд зака үүдәгч бүрдәцин Ахлач Владимир Константинов кеҗ-күцәҗәх көдлмшиннь тускар ахрар келәд, бәәрн улс эднә үүлдвриг үнлҗ дөңнҗәхиг темдглв. Күндтә гиич Хальмг Таңһчин Улсин Хуралын (Парламентин) Ахлач Артем Михайловд Крым Республикин Хүүвин 10 җилин өөнин медаль бәрүлҗ өгв. Ирлцңгү ачлврар Хальмг Таңһчин Толһач Хаска Бату болн 2008-2023 җилмүдин эргцд таңһчин Улсин Хуралын Ахлачар үүлдҗәсн Анатолий Козачко темдглгдв.
Хургт ут тоодан 60 төр хәләгдв, комиссьмүдин болн комитетмүдин ахлачнр орулгдҗах седвәрмүдин тускар зәңглв. ЮРПА-н медлд ордг субъектсин зака үүдәгч бүрдәцс олн үртә өрк-бүлмүдиг дөңнлһнә, шишлң цергә керг-үүлдврт орлцачнрт онц зөвтә немр керг-үүлдврмүд батллһна, селәнә эдл-аху, сойл, спорт делгрүллһнә, эрүл-менд харлһна халхд шаңһа закадт сольвр оруллһна, орн-нутгин күцәгч йосна бүрдәцст эрлһ оруллһна туст седвәр татв. Хургт орлцачнр хәләгдсн төрмүдиг нег дууһар батлв.
Авъяст тохрсар, ЮРПА-н хургт даруһас көдлмшиг һардх ахлач батлгдад, дарани сүүр болх регион шүүҗ авгдна. Ассоциацин Хүүвин шиидврәр Ростовск мүҗин зака үүдәгч Хургин Ахлач Александр Ищенко Әрәсән Өмн үзгин парламентск ассоциацин Ахлачд батлгдв, дарани сүүр Ростов-на-Дону балһснд намртан болхмн. Хургт орлцачнр Хүүвин шиидвриг нег дууһарн дөңнв. Хургин чилгчәр Хальмг Таңһчин Улсин Хуралын (Парламентин) Ахлач Артем Михайлов зәрм субъектсин зака үүдәгч Хургудын элчнрт ЮРПА-н Күндллһнә һашгуд бәрүлҗ өгв.
ЮРПА-н хургин медлд Хальмг Таңһчин Улсин Хуралын (Парламентин) болн Луганск Улсин Республикин Антрацитын муниципальн округин Хүүвин хоорнд нөкцлтин бооцан батлгдв.

ДООҖАН Наталья

ТООЛВР:
Артем МИХАЙЛОВ,
Хальмг Таңһчин Улсин Хуралын (Парламентин) Ахлач:
- Хургин көдлмш күцәмҗтә болв, депутатнр әмтнә җирһл ясрулхин төрәр седвәр орулв. Тедниг Әрәсән Орн-нутгин Хүүвд, Федерацин Хүүвд, Әрәсән залврт дөңнх гиҗ бидн ицҗәнәвидн. Ут тоодан бидн җирн һар төр хәләһәд, ухан-тоолврарн хувалцвидн. Мана таңһчин Улсин Хурал 6 седвәр татад, шаңһа закадт сольвр орулх сүв-севлг орулвидн. Мана таңһчд иим чинртә хург нег үлү Үрс Сард болснь ончта. Эн хургт 12 делегац орлцв, бидн хамцу үүлдҗ, мана регионмудын әмтнә җирһл улм сән-сәәхн болхин төлә цааранднь кех-күцәх көдлмшин зура батлҗ аввидн.
Александр ИЩЕНКО,
Ростовск мүҗин зака үүдәгч Хургин Ахлач:
- Мана мүҗин төлә эн хург чинртә болн туста болв, юңгад гихлә мана зака үүдәгч Хург орулсн сүв-севлгүд болн седвәр дөңнгдв. Келхд, босхсн төрмүд зуг мана мүҗин төлә биш, ЮФО-н цуг регионмудын төлә чинртә юмн. Комиссин сүүрт орлцачнр хәләгдсн төрмүдәр ухан-тоолврарн хувалцҗ, эднә регионмудын дамшлтын тускар келв, тегәд бидн терүг олзлҗ зака үүдәгч көдлмшән ясрулҗ чадхвидн. Иим харһлтс туста, кергтә болҗахнь эндрк хург иткүлв. Намртан бидн ЮРПА-н дарани хург давулх зөв аввидн, эннь маднд ик дааврта болҗана.

Видео