Өөмхдән дурта медәт

Элст балһснд бәәдг Аршина Анна бичкнәсн авн өөмхдән дурта. Эднә өрк-бүл Ростовск мүҗин Зимовниковск района Конезавод селәнд бәәдг билә. Тенд бәәрн бичкдүд зуни цагт һолд өөмәд, бийснь усчдг дассмн. Эдн дерин һадриг салькнд делсәд, терүг олзлҗ өөмдг дассиг Анна Борисовна ода инәҗ тодлна.
Күүкднь өсәд-босад эврә өрк-бүлмүдтәһән талдан балһсдт бәәнә. Ачта амрлһнд һарсн медәт сул цаган тустаһар давулхин төлә «Ойрат-арена» гидг спортивн төвд бәәдг бассейнд өөмдг болв. Сүл һурвн җилин эргцд эн талдан медәтнрлә хамдан долан хонг болһн тиигәрән одна. Ачта амрлһнд бәәдг улс сард 900 арслң өгәд, эдн өрүн 7 часас авн 12 час күртл ирҗ чадҗана. Энүнлә хамдан дал-най һарсн медәтнр бассейнд ирҗ өөмнә, эдн түрүләд цогц-махмудан тинилһәд, зарядк кенә, зуг терүнә хөөн уснд орна.
- Нааран ирҗ өөмдг болснас авн гемндгән уурв. Намрин-үвлин кемд хальдврта гем учрхш, эрүл-мендм батрв. Уснас һарсна хөөн шимтә хот идх дурн күрнә, нөр сән болна. Одахн эмчд одад, зүркм шарклдг болв гиҗ келхләм, уснд өөмхлә сән болхмн билә гив. Уснд өөмлһн олн зүсн гемәс гетлнә, эрүл-мендиг батрулна гиҗ эмч селвг өгв. Тегәд цааранднь чигн бассейнд одад бәәхв. Энд бассейн ик, гүн, сарул, уснь цевр, маднд йир таасгдна. Медәтнрин төлә салу цаг-болзг йилһҗ өгснь сән, мадн үд күртл ирәд, энд цогц-махмудан батрулнавидн, – гиҗ Анна Борисовна келнә.
Медәтнр өөмсн цагт дамшач уснд бәәдг улсиг хәләһәд, саг бәәнә. Өөмҗ чаддго болхла, эн дасхна, ямр кевәр уснд бийән бәрхиг заана. Анна Борисовна бийнь бичкнәсн авн усчдг болв чигн энүнд үр Овкаҗин Алла олн зүсн эв-арһар өөмдгиг дасхв. Нәәҗнь спортивн ик сурһульд сурч йовсмн, тегәд чикәр болн олн зүсн эв-арһар усч чадна. Эдн уснд орхларн нег-негән хәләһәд, удан цагтан өөмхдән дурта. Энүнә келсәр, хамдан усчдг медәтнр хоорндан таньлдад, завсрин кемд бәәдл-җирһлин тускар күүнднә. Келхд, җирн тавта Анна Борисовна эдн дунд баахн күүкд күүнд тоолгдна. Эдн дунд дал-най һарсн ээҗнр баһ биш бәәнә. Зәрмснь Троицкое селәнәс нааран ирҗ бассейнд өөмнә.
Анна Борисовна ода Элстд һанцарн бәәнә. Эн өрүн босад, цогц-махмудан тинилһҗ зарядк кенә, балһсна уульнцсар йовһар йовна, асхнднь бас цевр аһар киилҗ цаг-зуур һаза йовна. Аршина Анна һурвн үртә, зурһан ач-зеетә. Эн олн җилдән бичкдүдин садт замч болҗ көдлҗ йовсмн, ода ачта амрлһнд бәәнә, зеенрнь бичкн бәәсн цагт тедниг хәләҗ күүкдтән дөң болҗ йовла. Хойр күүкнь болн көвүнь экнь бийдән тааста керг олҗ цаган тустаһар давулҗах йовдлар бахмҗ кенә. Артем зе көвүнь зуни амрлһнд ээҗдән ирхләрн, бичкдүдин үүдәлтин бәәшңд бәәдг бассейнд одад, усчдг дасв. Тегәд ээҗ зе көвүн хойр хамдан ик бассейнд эс гиҗ теңгст өөмхәр зуралҗана.

ДООҖАН Наталья