Мек-тах һарһад, байҗхар седҗ

Өдгә цагт зөв-йос эвдлһнә халхар баһ биш йовдлмуд учрҗадгин тускар дару-дарунь соңсгдна биший. Бәәдл-җирһлин тетклһн дор орад,хамг юмн үнтәрәд гихв, эс гиҗ хар саната, өөрхн ухата улст меклгддгнь олн болв гихв,зуг ирлцңгү бәәдл тас ясрҗахш, гиҗ келх кергтә. Эн туст зөв-йос харлһна бүрдәцс олна дунд гетллһнә, саглуллһна керг-үүлдврмүд күцәдг бийнь, өдр болһн гилтә энд-тенд хулха-була кеснә, мек-тах һарһсна, күүнә әмнд чигн күрснә, дааҗадг үүлән давулҗ күцәснә тускар даңгин зәңглгднә.

Шидр болхла бас ирлцңгү нег йовдл учрсна тускар медгдв. Тиигәд Хальмг Таңһчин прокуратур шаңһа арвн һурвн сай шаху (!) арслң хулхалхар седжәсн улсин туст цааҗин керг бүтәҗ, зарһд йовулсн болв. Учрнь юундв гихлә, Хар Һазра района хойр иргн мек-тах һарһад, хоорндан үгцәд, күүнә зөөриг ик кемҗәнд хулхалхар седсн төләдән ода чаңһар гемшәгдҗәдг болна. Мөшклһнә керг-үүлдвр давулгдсн кемд эн хойр нидн мөрн сард «деерәс» һарһҗ өгдг мөңгнә дем авхар Хальмг Таңһчин селәнә эдл-ахун министерствд йоста биш бәрмт цаасд орулҗ өгсн бәәҗ. Энүндән эврә райондан ил элсиг батллһна туст ирлцңгү көдлмш күцәсән иткүләд, эн кергт һарһсн мөңгнә кемҗәг заахларн, мек-тах һарһснь илдкгдсн болв. Тегәд эн хойр иргн һарһсн һаруһан даңцах санатаһар министерствд худл цаасд орулсн болҗ һарв.
Зуг эдн күслдән күрч чадсн уга, юңгад гихлә селәнә эдл-ахун министерствд эднә бәрмт цаасд шаңһа дөң күрглһнә диг-даранла ирлцлго бәәв. Минь тиигхд чигн гемшәгдҗәдг улс зака эвдәд, зөв угаһар шаңһа мөңг авхар седҗәснь илдкгдв. Тегәд эднә туст ирлцңгү цааҗин керг бүтәгдснь тер.
Өңгәр юмн нег үлү ода цагт уга болдгиг әмтн яһад мартддг болхвий, зөв-йос эвдәд, мекләд, худл келәд, нууһад байҗхар седжәсн, ик ору авхар ухалҗасн кен-негнәннь бәәдл-җирһлд учрсн һашута йовдлмуд наадкстнь яһҗ серл эс орулдвий, гисн санан эн кемд үүднә. Акад юмн, мөңгн гихлә зәрмнь на-цаадкинь тоод авдго кевтә, кесн үүл эзән темцдг гиҗ хальмгуд келдгәр, үнн юмн кезәд чигн үнндән һардгиг мартҗ болшго. Нег үлү мек-тах һарһад, белдсн хаҗһр бәрмт цааснд заагдсн то-дигмүдин үнн худлнь аш сүүлднь лавтаһар медгдхнь маһд уга юмн.
Тегәд ода зака эвдәд, дала мөңг хоршаһад, агчмин зуур байҗхар седжәсн Хар Һазра хойр иргнә туст бүтәгдсн цааҗин керг Лаганя зарһд йовулгдад, зарһин сүүр давулгдсна хөөн ирлцңгү шиидвр авгдх, гиҗ күләгдҗәнә. Засгла харһулгдҗадг улс болхла, ода ирҗ толһаһан цокч, ухаһан туңһаҗ, ямр гем һарһсан гүүнәр шинҗлҗәдг боллта. Эднә туст бүтәгдсн цааҗин керг наадкстнь сурһмҗта болҗ, уха орулҗ, зөв- йос эвдлһнәс гетлх зөвтә, гиҗ сангдна. Өңгәр юмн кенднь чигн туста болдг угаһинь медх кергтә.
Шагҗин Любовь