Хальмг Таңһч болн Беларусь: нөкцлт делгрҗәнә

25-05-2024, 16:28 | Общество, Таңһчин зәңгс, Зіњг

Нидн Хальмг Таңһчин Толһач Хаска Бату Беларусь орҗ, эн орн-нутгин толһач Александр Лукашенкола харһҗ, кесг халхсар нөкцлтхәр бооцас батлсн билә.
Шидр Беларусь Республикин Залврин элчнр мана таңһчд ирҗ, нөкцлтин халхар болсн хамцу селвлцәнә көдлмшт орлцв.
Хальмг Таңһчин Залврин Ахлачин негдгч дарук Цернә Эрднин темдглсәр, батлсн бооцас сән йовудтаһар, селәнә эдл-ахун халхар болхла, кесг төсвс цаарандан күцәгдҗәнә. Нег һазра мана фермермүд Беларусьт кеҗ һарһдг МТЗ-н тамһта трактормуд болн талдан техник олар хулдҗ авчана. Өдгә цагт Элстд секгдсн нертә заводын салврт эн трактормуд хулдҗ авч болхмн.
– Эндр нөкцлтин халхар инвестиц оруллһна шин төсвс күцәдг арһ бас бәәнә. Буудя хадһлҗ теермддг, зер-земш урһадг бәәр, зуульчллһна бүрдәц тосхҗ болна. Тер мет нидн Элстд давсн экономическ хургин йовудт «Юнивест» компаньла бооца батлгдад, әмтәхн болн һуйрин зүүтә хот-хоолын лавк мана таңһчд секхәр үгцсн билә. Эн төсвиг цааранднь делгрүлх кергтә. Терүнәс нань «Калмык Вул» компань сән чинртә ноос Беларусьт илгәнә. Дәкәд болхла, нидн таңһчин селәнә эдл-ахун министерствин делегац «Белагро» һәәхүлд орлцв. Мел тер һәәхүлд МТЗ-н һардврла Элстд нертә заводын салвр секхәр бооцан батлгдв, – гиҗ таңһчин Залврин Ахлачин дарук, финансин министр Шуурһчин Очр келв.
Хамцу селвлцәнә йовудт номин болн сурһуль-эрдмин төрәр күүндвр бас һарв. Б.Б.Городовиковин нертә Хальмг ик сурһуль Беларусин номин кесг бүрдәцслә нөкцлтҗәнә. Мана ик сурһулин ул деер бүрдәгдсн мал өсклһнә бүрдәцин ханьд Беларусин номин академин номин-дамшлтын төв бас орв. Хальмг вузин һардач Салан Бадмин темдглсәр, сүл хойр җилин эргцд Беларусин ик сурһульмудла арвн зурһан бооцан батлгдв. 2023 җилд мана вуз «Суффолк» болн «Иль-дэ-франс» тохма арвн хө Беларусин эдл-ахуһас авч ирхәр үгцсн билә. Тер мет «Агроинженерий» болн «Агробизнест техническ бүрдәцс» хамцу көтлвриг экләд күцәв.
Тосхлтын болн ЖКХ-н халхар болхла, лифтын болн хату хог-богиг уга кедг шишлң кергслмүдиг Беларусяс авч ирхәр бас үгцсн билә. Сойлын, зуульчллһна болн спортын төрмүд бас эн сүүрт хаһлгдв. Мана таңһчд агрозуульчллһиг делгрүлхәр зуралҗана. Беларусин Залврин элчнр спортивн хамцу керг-үүлдврмүдиг давулх седклтә бәәхән бас медүлв.
Гиичнрин делегациг ахлҗ ирсн Беларусин көлгн-күчнә министр Алексей Ляхновичин темдглсәр, Беларусь Хальмг Таңһчла әдл селәнә эдл-ахун республик болна. Тер мет тосхлтын, эрүл-менд харлһна, баһчудын политикин, зуульчллһна, сурһуль-эрдмин болн талдан халхсар цааранднь нөкцлтхәр чигн медүлв.
Хамцу селвлцәнә йовудт така сарин 3-д темдглгдх Беларусиг немшнрәс сулдхсн 80 җилин өөнин төрин тускар бас күүндвр болв. Төрскән харсгч Алдр дәәнә цагт 534 мана һазра салдс Беларусин һазрт дәәлдҗ йовла. Хөрн дөрвн Советин Союзин Баатрмудас зурһань мел Беларусьт дәәлдәд, туурмҗарн ончрад, өөдән чинртә нер зүүсн болдг.
Әрәсән цергә-тууҗин ниицәнә региональн әңгин һардач Күүкән Нарна зәңглсәр, эн җил ончта өөнлә ирлцүләд, Беларусиг сулдхсн нег һазра мана салдсмудын тускар шишлң монографь барас һарһхар зуралҗадг болв.
КАРСАНА Евгения

Видео