Хальмг сойлын Өдр

Хөн сарин 30-д Москва балһснд Бичкдүдин Әрәсән шаңһа дегтрин саңд «Здравствуй, сосед!» төсвин йовудт хальмг сойлын Өдр давулгдхмн. Әрәсән орн-нутгт бәәдг олн келн-улсин тускар эн төсв күцәлһнә йовудт дегтрин саңгин көдләчнр олн-әмтнд келҗ өгхмн.

Тер өдр дегтрин саңд ирсн күн болһн Хальмг Таңһчин тууҗла, сойлла, хальмгудын авг-бәрцлә, байн амн үгин зөөрлә таньлдҗ, хальмг келн-улсин шимтә хот амсч чадхмн. Тер мет байрин йовудт Хальмг Таңһчин туск марһан болхмн, дегтрмүдин болн зургудын һәәхүл бүрдәгдхмн, «Одн» нертә дууна марһанд орлцсн нег һазра дууч Дорҗин Җирһл билг-эрдмәрн байрлулхмн болн талдан соньн керг-үүлдврмүд давулгдхмн.
Тиим Өдрмүд давуллһна йовудт келн-улсин туульс-домгудт, номин болн сурһмҗллһна утх-зокъялд онц оньг өггднә. Дорас өсч йовдг баһчуд мана орн-нутгт кедү келн-улс бәәдгинь медҗ дастха гиҗ керг-үүлдврин бүрдәһәчнр һол күсл тәвҗәнә. Нөкәдүр Москва балһснд бәәдг болн көдлҗәдг нег һазра мана улс Калужская талвңд, 1-ч тойгта герт бәәдг Бичкдүдин Әрәсән шаңһа дегтрин саңд ирҗ, чинртә керг-үүлдврт өңгәр орлцҗ чадхмн. Әрәсән Президентин медлд бәәдг Хальмг Таңһчин элчллтин дөңгәр эн керг-үүлдвр давулгдх, гиҗ зәңглгдв.
ОЛЬДАН Цаһан