Хаалһсин бәәдлиг бүрткҗәнә

Шидр Хальмг Таңһчин Улсин Хуралын (Парламентин) Ахлач Артем Михайлов «Шин улс» партин әңгин һардач Гаджи Фероянла харһҗ күүндв. Харһлтын йовудт удл уга болх сессьт хәләгдх төрмүдин тускар күүндәд, кех-күцәх көдлмшин һол зөрүллтс темдглв. Одахн мана таңһчд болсн ЮРПА-н сүүрт Хальмг Таңһчин Улсин Хуралын депутатнрин седвәрәр орулгдсн закана төсвс сессьт бас хәләгдхмн гиҗ харһлтд орлцачнр келв.

«Шин улс» партин әңгин һардвр шишлң цергә керг-үүлдврт орлцачнриг болн эднә өрк-бүлмүдиг дөңнлһнә төрмүд хаһллһнд шунмһаһар орлцҗахиг Артем Васильевич темдгләд, Гаджи Фероянд ханлтан өргв. «СВО-д орлцачнрт болн эднә өрк-бүлмүдт бидн онц зөвин керг-үүлдврмүд батлҗ, таңһчин закадт сольвр орулвидн. Эднә төрмүдт бидн орлцҗ, килмҗән тусхах зөвтәвидн», – гиҗ Хуралын Ахлач келв.
Харһлтд келн-улсин төсвсин йовудт күцәгдҗәх керг-үүлдврмүд бүртклһнә төр бас босхгдв. Артем Михайловин тоолврар, «Шин улс» партин әңг әәмшг уга болн сән чинртә хаалһс тосхлһна төсвиг бүрткҗ, тосхлтс сән чинртә болхиг һол оньгтан бәрх зөвтә гив.
- Одахн би Яшкулин районд одсн биләв, тенд Улан Эрг болн Чилгр селәд хоорнд Яшкл һолар, Яшкл-Комсомольск-Артезиан хаалһд Мекләтә овад бәәдг тагтын ясвр бүрткҗ хәләв. Эн хойр тагтын ясвр Яшкулин болн Хар Һазра райодын төлә ик чинр зүүҗәнә. Ясврин көдлмш сәәнәр болн цаг-болзгтан кегдв. Яшкуль селәнд хуучн гермүдәс әмтиг нүүлһҗ авлһна көтлврин йовудт дөрвн патьрта гер тосхгдҗана. Эн гер аһуһарн 165 дөрвлҗн метр тогтана, эн җилин чиглч күртл селәнәхн шин бүүртә болхмн. Социальн халхар тосхгдҗах гермүдиг эрк биш бүрткҗ, цугнь дигтә-даратаһар күцәгдхиг цааранднь чигн оньгтан бәрхв, – гиҗ депутат темдглв.

ЗУРГТ: депутат Гаджи Фероян Яшкулин
районд тагтын ясвр шинҗлв