Суңһврин заканд сольвр орулгдв

31-05-2024, 15:49 | Общество, Таңһчин зәңгс, Зіњг

Урҗ өдр Хальмг Таңһчин Улсин Хуралын (Парламентин) дарани биш сессь болв. Сессьт долан сурвр хәләгдв, тедн дунд суңһврин туск заканд сольвр оруллһна, шидр мана таңһчд болсн ЮРПА-н сүүрт таңһчин Улсин Хурал орулсн седвәрмүдин туск төрмүд болв. Сүүрин эклцәр таңһчин Улсин Хуралын Ахлач Артем Михайлов депутат Болдра Валерийд Төрскән харсгч Алдр дәәнә баатрмудын санл мөңкрүллһнд нерәдгдсн керг-үүлдврмүдт шунмһаһар орлцсн төләднь Ростовск мүҗин Азовск района һардврин Күндллһнә һашг бәрүлҗ өгв.

Хөн сарин 15-д Әрәсән Президент «Әрәсән Федерацин иргнмүд референдумд орлцлһиг болн суңһврин зөв күцәлһиг тетклһнә туск» гидг федеральн заканд сольвр оруллһна туск заканд һаран тәвсмн. Тегәд шаңһа заканла таңһчин закаг ирлцүлхин төлә «Хальмг Таңһчин Толһачин суңһврин туск» болн «Хальмг Таңһчин бәәрн залврин бүрдәцст суңһвр давуллһна туск зәрм төрмүд» гидг закадт сольврмуд орулгдх зөвтә болв. Терүнәс иштә һазадын орн-нутгудын дөңгәр Әрәсән нериг муутхад худл зәңг тархадг, террористическ бүрдәцсин үүлдврт орлцсн улс суңһврт орлцх зөв уга, тер мет эдн суңһврин комиссин үүлдврт бас орлцҗ чадшго болв. Дәкәд эн сольвр орулгдсна ашт сенатормуд суңһврин шинҗләч болх зөв уга болҗана. Таңһчин Улсин Хуралын Ахлач Артем Михайловин темдглсәр, закана төсв цаглань белдгдв, юңгад гихлә намртан Хальмг Таңһчин Толһачин, Элст балһсна Хургин депутатнрин суңһвр болхмн. Депутатнр хәләгдсн төрәр ухан-тоолврарн хувалцсна хөөн терүг батлв.
Одахн Элстд болсн ЮРПА-н сүүрт таңһчин Улсин Хуралын (Парламентин) депутатнр Әрәсән Орн-нутгин Хүүвин Ахлач Вячеслав Володинә болн Әрәсән залврин Ахлач Михаил Мишустинә нернд зурһан төрәр Дуудвр келһнә седвәр татсн билә. Ик сүүрт орлцсн зака үүдәгч Хургудын элчнр мана депутатнрин седвәриг дөңнҗ, шаңһа закадт сольвр оруллһиг дөңнв, тегәд эн сессьт депутатнр тедниг батлв. Таңһчин Хуралын депутатнр социальн туслмҗ күрглһнд шаңһа дөңгин кемҗә икдүллһнә, шаңһа болн муниципальн цергллтст көдлсн улс даатхлһна пенсь авлһна, урһа модна эдл-ахуд көдлҗәдг мергҗлтнрин җалв өөдлүллһнә, әрк-чаһр хулдлһна туст неквр эвдсн цагт ялын кемҗә сольлһна төрмүдәр шаңһа йосна бүрдәцст дуудвр кехиг дөңнв.
Хальмг Таңһчин Улсин Хуралын (Парламентин) Ахлач Артем Михайлов сессин көдлмшиг диглҗ, суңһврин туск закан цаглань батлгдсиг темдгләд, намртан болх суңһвр шин заканла ирлцәтәһәр давулгдх гив. ЮРПА-н 40-ч сүүр мана таңһчд бүрдәмҗтәһәр, дигтә-даратаһар болсиг ирсн гиичнр темдглв, ут тоодан 12 делегац орлцад 60 һар төр хәләв. Әрәсән Өмн үзгин регионмудын зака үүдәгч Хургудын элчнр сүүр күцәмҗтә болсиг темдглв, тегәд Хальмг Таңһчин Толһачд, таңһчин залврин Ахлачд, депутатнрт болн парламентин көдләчнрт ханлтан өргҗәнәв, гиҗ Артем Васильевич товчлҗ келв.
ДАВАН Наталья

Видео