Кунделинг ринпочен номин цәәлһвр

Хальмг Таңһчд ик күндтә багш, өөдән цолта лам хөн сарин 31-д ирв. Хальмгин шаҗн лам Тензин Чойдакин болн Хальмгин төв хурлын үрврәр ирсн Кунделинг Бурхн Багшин Алтн сүмд гүн номин цәәлһвр өгв. Таңһчин райодар чигн күндтә багш йовв.

Эн ик багш Кунделинг Тацаг Джедрунг Ринпоче нер зүүнә.
Мөчн сарин нег шинд 1-д күндтә лам Бурхн Багшин Алтн сүмд номин цәәлһвр өгснд олн күн цуглрҗ ирв.
Өрүн йисн часла Манзшрин гегән бурхна үүдәсн цецн ухана туск номин цәәлһвр әмтнә оньгиг авлв. Бурхн-шаҗнд шүтдг әмтн Бурхн Багшин номин һол учр-утхинь медҗ авх зөвтән тускар хамгин түрүнд күндтә багш келв. Насарн әдл биш әмтн цуглрсинь, өвкнрәсн шаҗна номд шүтдгиг дассн ах үйин улс, теднә үрд, ода шин үйнь болҗадг ачнр-зеенрнь номд орхар ирсинь Кунделинг темдглв. Җирһлин ут хаалһднь бурхн-шаҗна ном түшг болҗ йовсинь зааһад, цааранднь чигн эн ном әмдрлднь чинрән геелго йовтха гисн седклән Кунделинг ринпоче медүлв. Бурхн Багшин номин һол үнлснь ухаһан чиклҗ авч цевр, цецн бәәдлд бәрлһән болҗахинь цәәлһәд, тер учрар ухаһан батлҗ авх кергтән тускар келхләрн, бичә алң болтн, ухаһан яһҗ чиклхмн гиҗ бичә әәтн гиҗ күндтә багш шоглв. Нәрн төриг цәәлһхин өмн әмтиг әәлһшгоһар, әмтнә оньгинь икдүлхәр шог орулҗ, сергәдг авъяс ик багшнрин цәәлһврт бәәдгинь кен чигн темдглсн болх.
Кунделинг ринпочен келсәр, күн төрхәрә ухата болдг, болв күн болһна ухан әдл болхш. Җирһлин йовудт күн өсәд, сурһуль сурад, дамшлт авад, немр олн медрл хоршаһад, ухаһан улм байҗана. Эн нер амлгдҗах ухаг тасрхан уга шинрүләд, зүсн-зүүл тоолврт залад бәәдг олн дамшлтын, тер дотр оюни медрлиг гүүдүлдг дамшлтын тускар күндтә багш келҗ өгв. Байн өрк-бүлд төрсн Бурхн Багшт төрүц юмн керг уга бәәсмн. Кергтә юмнь мел белн, цолнь бас йир өөдән болна. Кенәв гисән кеҗ чадх цуг арһ энүнд бәәсмн. Болв цуг тер бәәхтә тоот, дүүрң, белн җирһл көвүг авлсн уга. Эн мел уха туңһаһад, шинҗләд бәәҗ, талдан хаалһар йовх шиидвр авад, зурһан зүүл әмтнә, цуг әмтә тоотын төлә туста ном үүдәсн болдг. Өр-өвч седклин күчәр гүн тоолврта ном саяд улсин төлә үүдәсмн. Җирһлд учрдг зовлңгас гетллһнә, өр-өвч болн буйнч седклин хаалһд орлһна тер номин гүн утхинь медҗ авхин төлә юн кергтәһинь Кунделинг ринпоче цәәлһвр өгв. Ухаһан батлҗ авлһна хаалһд харш болх тоотас, чик тоолвр келһнәс хаҗилһдг тоотас болн төрүц керг уга нань чигн тоотас гетллһнә ямаран дамшлт бәәхинь күндтә багш зааҗ өгв. Оюни медрл авлһна эн дамшлтд Манзшрин гегәнә цецн ухана туск номин цәәлһвр икәр туслдгинь медүләд, тер дамшлтыг дасч авлһна хаалһиг ринпоче заав.
Үдин хөөн Зунква гегәнә гегәрлтин хаалһд туслх номин цәәлһвр олн улст Кунделинг ринпоче өгв. Мөчн сарин 2-т Цаһан Дәркин номин цәәлһврт орад, әмтн ут нас зүүлһнә номин дамшлтла таньлдв.
Мөчн сарин 3-д Кунделинг ринпоче Баһ Дөрвд селәнд одад, тенд бәәрн улсла харһҗ номин цәәлһвр өгв. Мөчн сарин 4-д үд күртл Хальмг ик сурһульд Кунделинг ринпоче номин харһлт кев. Мөчн сарин 6-д Күнделинг ринпоче Ик Буурла районд әмтнлә харһв. Мөчн сарин 7-д Кунделинг ринпочег Лаганьд тосч авсмн.
Тиигәд шаҗнд шүтдг әмтнд гүн медрлтә багшин номин цәәлһвриг соңсх таал мөчн сарин эклцәр учрв. Бурхн Багшин Алтн сүмд Кунделинг ринпоче номин гүүнәс әмтнд соңсулхмн.
Өөдән цолта багшин тускар келхлә, Кьябдже Тацаг Джецун Тензин Чойки Гьялцен Кунделинг ринпочен 13-ч хүвлһнь болҗ, шаҗнд шүтдг улс дунд эн күндлгднә. XIV Дала Ламин Гегән Күнделинг ринпочен хүвлһн болҗахинь зәрлг болҗ медүлсн юмн. Үрс Сарин евәлин күчн цаарандан делгрәд шаҗнд шүтдг таңһчин әмтнд өөдән цолта багшин гүн номд орх таал учрв.
Кунделинг ринпоче Әрәсән талдан чигн регионмудт күрч, шаҗна ном цәәлһхмн. Мөчн сарин 9-11 Кунделинг Санкт-Петербургд одхмн. Орн-нутгин хотл балһснд ик багш мөчн сарин 12-ас авн 16 күртл бәәхмн. Цааранднь Тувад одад, мөчн сарин 18-әс авн 25 күртл бәәҗ, харһлтс кеҗ, номин цәәлһвр өгхмн. Мөчн сарин 28-әс авн така сарин 3 күртл болхла Бурятин шаҗнд шүтдг әмтн күндтә ламиг тосч авхмн.

УШКАНА Сувсн