Өөнләнь йөрәв

Әрәсән Президентин даалһврар нидн мана орн-нутгт, тер тоод Хальмг Таңһчд «Төрскән харсачнр» гидг саң бүрдәгдәд, цергә керг-үүлдврт орлцачнрт болн эднә өрк-бүлмүдт дөңгән күргҗ үүлдҗәнә. Мөчн сарин 1-д саң түрүн өөнән темдглв. Хальмг Таңһчин Улсин Хуралын (Пардаментин) Ахлач Артем Михайлов «Төрскән харсачнр» гидг саңгин региональн әңгиг өөнләнь йөрәһәд, көдләчнрт ачлвр бәрүлҗ өгв. Темдглхд, саңгин әңгиг таңһчин Улсин Хуралын депутат Хаалһин Очр һардҗана.

- Региональн әңгин һардач болн көдләчнр СВО-д орлцачнрин төрмүд хаһлҗ, күцәмҗтәһәр үүлдҗәнә. Хаалһин Очр бийнь цергә үүлдврин ветеран болна, тегәд цергчнриг болн эднә өрк-бүлмүдиг үүмүлҗәдг төрмүдиг сәәнәр меднә. Хальмг әңгд цаһан седклтә, кергән сәәнәр меддг, килмҗтә улс көдлҗәнә. Мана цергчнр орн-нутгт әәмшг уга бәәдл теткҗ, залу-зөрмг кевәр даалһвран күцәҗ йовна, бидн эднә өрк-бүлмүдиг дөңнх зөвтәвидн, - гиҗ Артем Васильевич келв.
Батан Сәәхлә