Ач-тусинь темдглв

Шидр Хальмг Таңһчин Улсин Хуралын (Парламентин) Ахлач Артем Михайлов «Сән кергин цаг» гидг эврә сән дурар үүлддг улсин җисәнә ахлач Шаран Лейлад Әрәсән харслтын заллтын Келн-улсин төвин һардач Станислав Гаджимагомедовин Ханлтын бичг бәрүлҗ өгв.

Эврә сән дурар үүлддг җисән Целинн районд пандемий эклснә түрүн өдрәс авн бүрдәгдәд, баһ тетквртә, олн үртә улст болн медәтнрт дөң-тусан күргдг болсмн. Ода эдн цергә шишлң керг-үүлдврт орлцачнрт болн эднә өрк-бүлмүдт килмҗән тусхаҗ, хот-хоолар, эмәр болн кергсләр теткҗ, бу-селм бүркдг гөлм өлгҗәнә. Эн җисәнд буйнч седклтә, седвәртә, төрскн һазр-усндан эңкр улс орна. Артем Васильевич эднә үүлдвриг өөдәнәр үнлҗ, эднә көдлмш күцәмҗтә болтха гив.
Тер өдрин бийднь Артем Михайлов С.Радонежскийин нертә Орс Келн-улсин гимназин багш Цернә Цаһанд Хальмг Таңһчин Улсин Хуралын (Парламентин) Ахлачин Ханлтын бичг бәрүлҗ өгв. Цаһан Анджаевна олн җилдән сурһуль-эрдмин халхд көдлҗ, хазгудын сойл болн авъяс хадһллһнд, дорас өсч йовх бичкдүдт төрскнч сурһмҗ өглһнд ик тәвцән орулҗ йовна. Артем Васильевич багшин ач-тусинь темдгләд, цааранднь олн җилдән сурһуль-эрдмин халхд көдлҗ, бичкдүдт гүн медрл болн чик сурһмҗ өгч көдлхиг дурдв.

Батан Сәәхлә