Арһлачнрин седвәр

Мана таңһчд өрк-бүлин җилд нерәдгдсн керг-үүлдврмүд дару-дарунь бүрдәгдҗ, өнр-өсклң улсиг негдүллһнд туслна. Одахн Элст балһсна ар-барун үзгт бичкдүд нааддг талвңгин өөр «Хөвтә өрк-бүлмүдин модд» гидг керг-үүлдвр болв. «Опора России» гидг олна бүрдәцин әңгин Хальмг Таңһчд үүлддг арһлачнр – күүкд улсин седвәрәр энд олн зүсн модд суулһгдв. Келхд, урднь энд «Ар үзг» гидг баһчудын ниицәнә седвәрәр бичкдүдин талвң тосхгдсмн.

Хальмг Таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министр Өлзәтин Марина байрин керг-үүлдврт орлцад, энд бәәдг өрк-бүлмүдиг йөрәв. Марина Петровна энд модд суулһлһна керг бүтәсн арһлачнрт ханлтан өргәд, министерстин Ханлтын бичг бәрүлҗ өгв. «Мана таңһчд седвәртә, төрскн һазр-усндан эңкр, өрк-бүлин чинр өөдлүлхәр шунҗадг улс олн бәәнә. Өрк-бүлин җилд хөвтә өрк-бүлмүдин модд суулһх седвәр татснь хойр дам темдгтә. Модн дурна болн өрк-бүлиг олн җилдән ямаран чигн күчр-күнд йовдлас харсдг темдг гиҗ тоолгдна. Олн ацта модн өнр-өсклң өрк-бүллә ирлцдг. Җил ирвәс модн батрад бәәхлә, өрк-бүл чигн өсәд-өргҗәд йовдг. Эн буйнта керг бүрдәсн улс моддыг арднь орҗ хәләх гиҗ санҗанав. Күүкд улс – арһлачнр болн «Ар үзг» гидг баһчудын ниицән дәкәд чигн туста болн чинртә кесг керг-үүлдвр хамдан күцәхнь лавта. Тана седвәр талдан улст чигн үлгүр-үзмҗ болтха», – гиҗ Марина Петровна келв.
Ар-барун үзгт бәәдг 40 өрк-бүл хамдан альм, кедм, хусм болн нань чигн модд суулһад, тедниг эцкнрт нерәдв. Хальмг Таңһчд үүлддг арһлачнр-күүкд улсин әңгин ахлач Мария Кнуреван келсәр, нааран ирдг бичкдүд болн эк-эцкнр сүүдрт сууһад, хамдан амрхин төлә модд суулһх шиидвр авгдсмн. Эднд Элст балһсна Хургин депутат Дорҗин Бадм болн «Ар үзг» гидг баһчудын ниицәнә гешүд дөңгән күргҗ бас модд суулһв. Дәкәд энүнә эргндк һазрнь бас кеерүлгдв.
Суулһсн модд сәәнәр урһхин төлә тедниг услад, болн бичкдүд нааддг талвңд шам орулх төрмүдиг Элст балһсна һардврла Өлзәтин Марина күүндх болҗ үгән өгв. Цөөкн җил давад, энд олн зүсн модд шавшад урһҗ, зер-земшәрн бичкдүдиг байрлулхнь лавта.

БАТАН Наталья