Бичкдүдин зөв харсад

Шидр таңһчин залврин герт Улсин Хуралд (Парламентд) Хальмгин Толһачин элч Манҗин Арашин һардврт бичкдүдин зөв харсдг хүүвин селвлцән болв. Тенд цергә шишлң керг-үүлдврин орлцачнрин өрк-бүлмүдиг дөңнлһнә болн зуни цагт бичкдүдин амрлһ бүрдәлһнә тускар келгдв.
– Өдгә цагт бидн цергә шишлң керг-үүлдврт орлцачнрин үрдт онц оньган тусхах зөвтәвидн. Тер мет зуни амрлһндан һарсн арвтнрин төлә талдан регионмудт амрдг арһ бас олх кергтә, – гиҗ таңһчин бичкдүдин зөв харслһна күцц зөвтә элч Чужан Наталья келв.
Цергә шишлң керг-үүлдврт әмнәсн хаһцсн болн эндр түрүн зергләнд дәәлдҗ йовдг нег һазра мана улсин өрк-бүлмүдиг дөңнлһнә немр эв-арһсин тускар таңһчин социальн саңгин һардачин дарук Дорҗин Алла болн социальн делгрлтин, күч-көлснә болн көдлмшәр тетклһнә министрин дарук Һәрән Ольга цәәлһвр өгв.
Таңһчин социальн саңгин әңг сар болһн СВО-д әмнәсн хаһцсн цергчнрин өрк-бүлмүдт дөңнлһнә олн зүсн эв-арһс йилһҗ өгнә. Тер дунд ЖКХ-н туслмҗин, сурһульчнриг өңгәр халун хотар – зуни амрлһнд болн эмнлһнд путевкар тетклһнә болн талдан кесг тоотын төлә мөңгн йилһгднә.
Хальмгин Роспотребнадзорин әңгин һардачин дарук Элина Бродскаян келсәр, эн җил таңһчд бичкдүдин төлә 103 лагерь көдлхмн гиҗ зуралгдҗала. Эн тоод сурһульмудын ул деер өдрәр көдлдг 99 лагерь болн таңһчин райодт эмнлһнә 4 лагерь орна. Сурһульмудын ул деер бүрдәгдсн тавн лагерь санитарн некврлә ирлцлго секгдсн уга. Тер мет Целинн района «Сайгачонок», Городовиковск района «Березка» болн Б.Б.Городовиковин нертә Хальмг ик сурһулин профилакторийин ул деер үүлддг «Җаңһр» лагерьмүдт бас бат ясвр күцәгдәд уга учрас эдн көдлмшән эклсн уга. Хәрнь, зуг «Җаңһр» лагерьт ясвр төгсчәнә, эн өдрмүдт тенд бичкдүдиг тосхмн.
Эндр таңһчин лагерьмүдт 6122 көвүн-күүкн амрчана. Эн төр таңһчин һардврин, залврин, бичкдүдин зөв харслһна күцц зөвтә элчин болн зөв-йос харлһна бүрдәцсин онц бүртклһнд бәәнә. Тиим селвлцән һурвн сард нег дәкҗ давулгдхмн.

КАРСАНА Евгения