Төрскән харсачнрт – онц оньг

Шидр Хальмг Таңһчин залврин Ахлачин дарук – таңһчин социальн делгрлтин, күч-көлснә болн көдлмшәр тетклһнә министр Өлзәтин Марина цергә шишлң керг-үүлдврт орлцачнриг дөңнлһнә шаңһа саңгин үүлдврин ведомствс хоорндк комиссин дарани сүүр давулв.

«Төрскән харсачнр» гидг шаңһа саңгин региональн әңгин һардач Хаалһин Очрин келсәр, эдн үүлдврән эклснәс авн 1835 күн эрлһән орулв. Эннь цергә шишлң керг-үүлдврт орлцачнр, әмнәсн хаһцсн цергчнрин өөрхн элгн-садн болна. Эднәс орҗ ирсн эрлһсин ик зунь күцәгдв. Нурһлҗ эннь социальн демин мөңг өглһнә, эмнлһ авлһна болн ямр нег төр хаһлхин төлә юридическ дөң күрглһнә, цергә шишлң керг-үүлдврт орлцачин иткл цаас авлһна төрмүд бәәсмн. Региональн саңгин әңг Элстд болн район болһнд үүлднә, социальн зүүцүләчин хәләврт 400 күн бәәнә.
Сүүрт СВО-д орлцачнриг көдлмшәр тетклһнә төр бас хәләгдв. Таңһчин социальн делгрлтин министерствин әңгин һардач Цаһан-Манҗин Маринан зәңглсәр, 2024 җилин эклцәс авн ут тоодан 47 күн көдлмш олҗ авхд нөкд болхиг сурв, теднәснь 15 күн СВО-д орлцач, наадкснь эднә өрк-бүлин гешүд бәәсмн. Урднь цергә халхар үүлдҗ йовсн дөрвн күн немр сурһуль сурв, мөчн сарин 17-ас авн дәкәд хойр күн сурһульд одхмн. Насни дигт күрәд уга 19 күүкн-көвүн зуни амрлһна кемд цаг-зуурт көдлмшәр теткгдв. Цергә шишлң керг-үүлдврт орлцачнриг дөңнхин төлә эдн немр сурһуль сурч, шин эрдм дасч авхин болн көдлмш олҗ авхин төлә немр керг-үүлдврмүд батлгдсн бәәнә, гиҗ министерствин элч келв.
СВО-д орлцачнр эмнлһ авлһна, эрүл-мендән батруллһна туст ямаран көдлмш күцәгдҗәхин тускар таңһчин эмнлһсин элчнр келҗ өгв. «Төрскән харсачнр» гидг шаңһа саңгин региональн әңг «Негдсн Әрәсә» партин бәәрн әңгүдлә нөкцҗ үүлдҗ, хамдан цергчнрин төрмүд хаһлхин тускар бас күүндвр болв.
Өлзәтин Маринан темдглсәр, саңгин әңг түрүн җилин эргцд күцәмҗтәһәр үүлдҗ, цергә шишлң керг-үүлдврт орлцачнриг болн эднә өрк-бүлмүдиг дөңнлһнә туст аһу ик көдлмш кев. «Саңгин әңгин көдләчнрт ханлтан өргҗәнәв, цуһар цергчнрт болн эднә өрк-бүлмүдт килмҗән тусхаҗ, цаһан седкләсн төрмүдинь хаһлхар шунҗ көдлҗәнә», – гиҗ Марина Петровна ашлв.
БАТАН Сәәхлә