Тывад болсн ик байр

Тыва Республикд шидр ик байр болв. Энд пандит Камбы-лам шаҗна өөдән цол үүдәсн цагас авн 105 җил болҗах өөниг Тывад өргнәр темдглв. Ончта өөнд нерәдҗ байрин ик мөргүл болв. Эн йовдлла ирлцүлҗ кегдсн шар шаҗна хургт олн үүлдәчнр орлцв.

«Тубтен Шедруб Линг» бурхн-шаҗна хамгин ик хурлд болсн байрин мөргүлд олн гиичнр цуглрв. Бурятин, Хальмгин, Алтан, Хакасин, Забайкальск крайин, Санкт-Петербургин болн Москван шаҗна үүлдәчнр оларн ирҗ, эн байрт орлцв. Һазадын орнас чигн гиичнр ирсмн, тер тоод Энткгин шаҗна үүлдәчнр ирҗ, байриг хувалцв.
Ик мөргүлин хөөн нарт-делкән шар шаҗна хург көдлмшән эклв. Тува СССР-ин ханьд орсна 80 җилин өөнлә ирлцүлҗ шар шаҗна үүлдәчнрин нарт-делкән эн хург бүрдәгдв. «XX зун җилд Туван һазрт шар шаҗна делгрлтин ончнь: делгрлтин өвәрцнь, пандит Камбы-ламин өөдән цол бүрдәҗ батллһн, ончта йовдлмуд» гидг нерәдлһтә «төгрг ширән» сүүрт болсн күүндвр бурхн-щаҗна номин делгрлтд өдгә цагт хаһлгдҗадг төрмүд цуг халхасн шинҗлгдв. Шаҗна эн ик чинртә үүлдврт Дрепунг Гоманг хурлын ах багш, гевш-лхарамб Джигме Гьяцо, Тыва Республикин Камбы-лам Гелек Нацык-Доржу (Сергек Сарыглар), Әрәсән шар шаҗна сүзгтнр Төвин оюни заллтын ахлач (ЦДУБ) гевш Йонтен (Сергей Киришов), Бурхн Багшин Алтн сүмд урднь ах багш болҗ церглҗәсн кхенсур Харцхан Анҗ, шар шаҗна сурһуль-эрдмиг болн шинҗллтиг дөңндг саңгин президентин дарук Денис Возилов, шаҗна нань чигн үүлдәчнр тоолврарн хувалцв. Бурхн Багшин номин делгрлтд туста болх олн төрмүдәр хургт болсн күүндвр цуглрсн улст тодлгдв.

УШКАНА Сувсн