Оларн диилвр делдхин төлә

20-08-2024, 11:18 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Бембә өдрлә Хальмг Таңһчин Толһач Хаска Бату Сарпан района Садовое селәнд көдлмшәр одв. Хамгин түрүнд нидн бат ясвр күцәгдсн Садовое селәнә 1-ч тойгта дунд сурһульд одад, тогтсн бәәдлиг дор ормднь шинҗлв.

Эн сурһулин гер 1879 җилд тосхгдсн билә. 1956 җилд болхла, түрүн сурһульчнран тосч авсмн. «Сурһульмудт өдгә цагин таал тогталһн» региональн төсвин йовудт энд бат ясвр күцәгдв. Сурһулин багшнр болн арвтнрин эк-эцкнр таңһчин Толһачиг тосч, сән ясвр күцәгдсинь темдгләд, ханлтан өргв. Бату Сергеевич сарул-сәәхн хорасар йовҗ, сән кец-таал тогтагдсинь ил үзв. Темдглхәс, бат ясврин йовудт сурһульд усн орулгдснь нег үлү чинртә болв.
Дарунь Хаска Бату Д.Маковкинә нертә 2-ч тойгта сурһульд бас одв. 2013 җилд Аһш балһсна төмр хаалһин вокзалд зеткртә йовдлд әмнәсн хаһцсн полицин ах сержант, сурһулин төгсәһәч Дмитрий Маковкинә нер эн сурһуль зүүнә. 2026 җилд эн сурһуль бас бат кевәр ясгдх болв. Мел тенд цергә шишлң керг-үүлдврт орлцад, әмнәсн хаһцсн цергчнрин өөрхн элгн-саднлань Бату Сергеевич харһв. Октябрьск, Баһ Дөрвдә, Сарпан болн Көтчнрә райодын муниципальн бүрдәцсин толһачнр бас эн харһлтд орлцв.
– Нег һазра мана улс олн дәәнд орлцад, зөргәрн, туурмҗарн тууҗд орсмн. Өдгә цагт СВО-н йовудт эңкр үрдән геесн эк-эцкнрлә зовлңгинь хувалцҗанав. Төрскнч седклтә, һазр-усндан хару, зөргтә дәәчнриг өсксн тадндан ханлтан өргҗәнәв. Цуг халхар ирлцңгү дөңгән күргхдән белн бәәнәвидн, – гиҗ Хаска Бату харһлтд орлцачнрт келв.
Тер өдр асхн селәнә сойлын Герин талвңд цергә шишлң керг-үүлдврт орлцачнриг дөңнҗәдг буйнч концерт болв. Келхәс, концертыг нег һазра седвәртә арһлач Александр Бердунов бүрдәсн болв. Онц темдглхд, Александр Верольдович СВО-д әмнәсн хаһцсн орлцачнрин өрк-бүлмүдт үнтә белгүд белглҗ. Керг-үүлдврт деер келгдсн райодын элчнр олар ирв. Москван «Яр» нертә дууна театрин артистнр, Әрәсән болн Кубаня ачта артист Виктор Сорокин цуглрсн улсиг билг-эрдмәрн байрлулв.
Буйнч керг-үүлдвриг секәд, Хаска Бату нүр үг келәд, эндр тогтсн амр биш цагла бидн цуһар негдәд, нег-негән дөңнх зөвтәвидн. Күн болһн дор ормдан олна кергин төлә көдлҗ, алдр Диилвр делдхин төлә эврә тәвцән орулҗ чадхмн, гиҗ Хальмгин Толһач онц темдглв.
Концертд орлцсн Әрәсән болн Кубаня ачта артист Виктор Сорокинә келсәр болхла, цергә шишлң керг-үүлдвр эклснәс авн эдн орн-нутгт бүрдәгдсн буйнч олн концертст орлцад, мана цергчнриг дөңнҗ йовна. Тер мет кесг госпитальмудар йовад, шавтсн салдсмудыг билг-эрдмәрн соньмсулна. Ямр чигн цагт дун олн-әмтиг негдүлҗ, күн болһнд урмд өгч, соңсачнрин седклинь байрлулна гиҗ артист келв.
Садовое селәнд бәәдг СВО-д орлцачин аваль, дөрвн үртә эк Ольга Оросован келсәр, өдгә цагт района болн таңһчин һардвр цуг халхар ирлцңгү дөңгән күргҗәнә. Энүнә ууһн үрнь арвн йистә, отхнь болхла һурвн сарта, энүгән теврәд, концертд ирв. Төрскнч седклтә дуд соңсад, СВО-д болҗадг амр биш йовдлыг цаг зуур мартад, күүнә седкл байсна, гиҗ эн тоолврарн хувалцв.
КАРСАНА Евгения

Видео