Төрскн таңһчан хамдан делгрүлий!

22-08-2024, 16:18 | Политика, Таңһчин зәңгс, Хальмг Тањєчин Толєачин ґдр-бўр, Зіњг

Шидр Элстд «Негдсн Әрәсә» партин Хальмг региональн әңгин хургин хойрдгч девсңгнь болв. Терүнд Хальмг Таңһчин Толһачин суңһврт партин көтлвр батллһна төр хәләгдв. Хургиг Хальмг Таңһчин Толһач, партин КРО-н сегләтр Хаска Бату секәд, Бурятьд болсн шаҗна нарт-делкән II-ч хургт орлцсна болн Москвад Хальмг Таңһчин социальн-экономическ делгрлтин көтлвр батлгдсна тускар зәңглв.

- Бурятьд болсн ик хургт мана таңһчин делегац орлцад, ирх җилин һаха сард дарани хургиг Элстд давулх зөв авснь байрта болн ончта йовдл болв.Талдан регионмуд шаҗна хургиг давулх санаһан бас медүлв, болв орн-нутгин һардвр мадниг дөңнәд, мана таңһч делгрҗәхиг үзәд, өөдәнәр үнлҗ, маднд тиим ончта зөв өгснь темдгтә. Мана таңһч байн тууҗта, өвәрц сойлта, бидн гиичнрт кесг соньн тоот үзүлҗ чадхвидн, тегәд ик хургт эртәснь белдвр кех кергтә. Дәкәд байрта нег зәңг бәәнә. Шидр Хальмг Таңһчин залврин Ахлач Босхмҗин Гиләнә һардврт мана таңһчин социальн-экономическ делгрлтин хойрдгч көтлвр батлгдв. Өөрхн зурһан җилин эргцд күцәгдх керг-үүлдврмүдт 6 җува арслң йилһгдхмн. Келхд, зәрм регионмуд эврәннь көтлврән харсч чадсн уга, манахс болхла, ирлцңгү керг күцәснь бахмҗта болна. Таңһчин социальн-экономическ делгрлтин түрүн көтлврин йовудт бидн аһу ик көдлмш күцәҗ, 250 төсв бәәдл-җирһлд тохраҗ чадвидн, 2 миңһн һар көдлмшч орм бүрдәввидн, нань чигн чинртә кесг төр хаһлвидн. Зуралсан үнн-чик седклтәһәр күцәҗ, эклсн кергиг күцәмҗтәһәр кехлә, мана таңһч улм делгрҗ батрхнь лавта, - гиҗ Бату Сергеевич нүр үгдән темдглв.
Дарунь партин хургин президиумд Әрәсән Федерацин Хүүвин гешүн, «Негдсн Әрәсә» партин Хальмг региональн әңгин сегләтрин негдгч дарук Байир Путеев, Хальмг Таңһчин Улсин Хуралын (Парламентин) Ахлач Артем Михайлов, таңһчин залврин Ахлач Босхмҗин Гилән болн Б.Б.Городовиковин нертә Хальмг ик сурһулин һардач Салан Бадм шүүҗ авгдв. Хургиг Байир Путеев һардҗ давулв. Хургин эклцәр Хальмг Таңһчин Толһач Хаска Бату ачлврмуд болн партин гешүдин иткл цаас бәрүлҗ өгв. Әрәсән Президентин суңһврин керг-үүлдврмүд күцәмҗтәһәр бүрдәсн төләдән Хальмг Таңһчин Толһачин һардврин ахлачин дарук Тарбан Савар «Негдсн Әрәсә» партин Ахлач Дмитрий Медведевин болн таңһчин Улсин Хуралын депутат, «Төрскән харсачнр» саңгин региональн әңгин һардач Хаалһин Очр «Негдсн Әрәсә» партин төв күцәгч комитетин һардач Александр Сидякина Ханлтын бичгүдәр ачлгдв. Тер мет таңһчин Улсин Хуралын медлд үүлддг баһчудын палатын гешүн Донкан Ангирад болн хотл балһсна 16-ч тойгта бичкдүдин садын сурһмҗлач Фазыла Саглрт «Негдсн Әрәсә» партин гешүдин иткл цаас бәрүлҗ өггдв.
Хальмг Таңһчин Толһачин суңһврт партин нерн деерәс орлцҗадг Хаска Бату көтлврин һол зөрүллтсин тускар келв. Энүнд заагдсн керг-үүлдврмүд Әрәсән Президент Владимир Путинлә болсн харһлтд келгдсн билә гиҗ Бату Сергеевич темдглв. «Мана таңһчин төлә хамгин һоллгч болн чинртә гиснь әмтиг уудг усар тетклһнә төр болна, энүг бидн экләд хаһлҗанавидн, усна сурвлҗна тосхлтын көдлмш ода эклв. Тосхлтын көдлмшиг өөдән чинртәһәр болн батлгдсн диг-даранла ирлцәтәһәр күцәх кергтә. Иҗл һолас ус оруллһна төсв күцәлһн мана таңһчин делгрлтд туслҗ, инвестиционн таал ясрулх. Эн төсвиг Әрәсән залвр дөңнсн бәәнә. Зәрм улс эн төсв күцәлһиг бурушана, болв энүг белдсн цагт бидн орн-нутгин шинҗләчнрин сүв-селвгиг тоод авсн биләвидн.
Бидн бәәрн әмтиг үүмүлҗәдг төрмүдиг сәәнәр меднәвидн. Мана таңһчд ни-негн, иньгллтин таал тогтаҗ, олн келн-улс сойлан делгрүлҗ, ниитә бәәхин төлә цугинь теткх зөвтәвидн. Би Хальмг Таңһчдан церглҗ, эврә һазр-усна делгрлтин төлә цуг арһ-чидлән агсч көдлх санатав. Төрскн һазриннь кишгт багтҗ, таңһчан делгрүлий», - гиҗ Бату Сергеевич келв.
Таңһчин Толһачин суңһврт орлцх даавр өгснд, хамдан чинртә төрмүд хаһлҗ дөңнҗәх төләднь Хаска Бату хургт орлцачнрт ханлтан өргв. Дарунь эдн Хальмг Таңһчин Толһачин суңһврт «Негдсн Әрәсә» партин региональн әңгин көтлвриг нег дууһарн дөңнҗ батлв.
ДООҖАН Наталья

Видео