Городовиковск балһсиг кеерүлҗәнә

Келн-улсин төсвсин кемҗәнд Городовиковск балһснд босхгдсн тосхлт усна өвәрц кеерүлин тоод орсн зәңг шидр һарв.
«Әрәсән келн-улсин төсвс» гидг соңсхврт энүнә тускар зәңглгдв. Орн-нутгт үүлдҗәдг өвәрц йовдлмудын тускар келҗ өгхләрн Городовиковскд бәәдг хамгин соньн болн сәәхн усна кеерүлиг заав.
Хальмг Таңһчин Городовиковск балһсна тал дунд тосхгдсн усна кеерүлин өөр даңгин әмтн олар хурна. Төв талвңгин медлд босхгдсн тосхлт келн-улсин янзиг орулҗ кегдснь соньн, өвәрц шиидврәрн әмтнә оньгиг авлна. Әмтн йовҗ йовхла, көл дораснь усн турглҗ деегшән хадгдна. Ямаран илвтә йовдл гинәт! Өндр бичкн бәәшңд час углгдҗ. Тернь Әрәсән тугин өңгәр герлтнә.
Паркин ар үзгт һурвн давхр күрәлң босхгдҗ. «Эвин күрәлң» гиҗ нерәдсн терүнд мөргүлин күрд бәәнә. Ирсн улс күрд эргүләд, зальврад һарна. Хальмгт бәәдг цуг келн-улсин негдлтиг тернь медүлҗәнә. Талвңгин өмн үзгт болхла, бурхн-шаҗна евәлтә босх ирсн әмтиг тосна.
Тодлулад келхлә, 2019 җилд Городовиковск балһсн Цугәрәсән марһанд диилвр бәрсмн. Баһ кемҗәтә балһсдт сән кец-таал бүрдәлһәр зарлгдсн марһанд эднә белдсн төсв дииләчнрин тоод орсмн. Тиигхд Хальмгин эн балһсн 40 сай арслң шүүҗ авад, балһснаннь кец-таалыг ясрулсна ашт Городовиковскд усна сәәхн кеерүл тосхгдв.
Седвәр бәәхлә, тиим сән күцәмҗ бәрҗ болхин туст ямаран сән үлгүр гиһит!
ҖИРҺЛИН Кермн