Хамцу үүлдвр олнд туста

24-08-2024, 18:13 | Общество, Таңһчин зәңгс, Зіњг

Шидр Хальмг Таңһчин Улсин Хуралын (Парламентин) Ахлач Артем Михайлов болн күүнә зөв харслһна дааврта элч Валерий Чуб харһад, хамцу үүлдврин төрәр күүндв. Иим харһлтс сән авъяст тохрҗ, нөкцлтиг батруллһнд туслна.

Харһлтын йовудт Валерий Чуб эн җилин түрүн зурһан сард күцәсн көдлмшин аш диглҗ, ямаран төрмүд эркн чинртә болсна тускар тодрхаһар келҗ өгв. Тиигәд, күүнә зөв харслһна элчин темдглсәр, эндр цергә шишлң керг-үүлдврт орлцачнрин болн эднә өрк-бүлмүдин төрмүд онц чинртә болҗана. «Зәрмдән цергчнрин зөв харсхин төлә олн зүсн кемтг учрна, тегәд эднә төрмүдиг бачм кевәр хаһлх кергтә болна. Бидн «Төрскән харсачнр» саңгин региональн әңглә болн мана таңһчд үүлддг Төрскнә харсачнрин өрк-бүлмүдин комитетлә бат залһлда бәрҗ хамцу үүлднәвидн», - гиҗ Валерий Чуб темдглв.
Артем Михайлов цергчнриг дөңнлһнә керг-үүлдврмүд күцәҗ, мана орн-нутгиг харсчадг улсиг болн өөрхн улсан геесн өрк-бүлмүдиг дөңнҗ, цугинь эднә төлә кех зөвтәвидн гив.
Тер мет харһлтын йовудт күүнә зөв харслһна элч райодар йовҗ бәәрн улсла харһлтс давуллһна тускар күүндвр болв. Селәнәхнә бәәдл-җирһләр болн әмтиг үүмүлҗәдг төрмүдәр соньмсч, эднә зөв харсч үүлдхин төлә иим харһлтс эрк биш кергтә гиҗ Валерий Чуб келв. Ода суңһврт белдвр кегдҗәнә, тегәд эн чинртә керг-үүлдвр дигтә-даратаһар давулгдхинь теткх кергтә.
ДООҖАН Наталья

Видео