Бүртклһнә көдлмш күцәхмн

«Хальмг Таңһчин Олна палат кесг бүрдәцлә болн партьлә бооцас батлна. һаха сард болх суңһвриг угтҗ, белдврин көдлмш күцәгдҗәнә.

Тер мет суңһвриг олн-әмтнд иләр үзүлхин төлә ирлцңгү көдлмш кегдҗәнә, гиҗ келх кергтә. Региональн чинртә суңһврин кергин йовудт Олна палатын гешүд бүртклһнә керг-үүлдвр күцәх зөвтә. Иргнмүдин зөв эвдшгоһин төлә ирлцңгү көдлмш 2012 җиләс авн күцәгдҗәнә, шинҗллһнә көдлмш болхла, 2018 җиләс авн давулгдҗана.
Һаха сарин 6-ас авн 8 күртл мана таңһчд Хальмгин Толһачин болн 7-ч хуралтын Элст балһсна Хургин депутатнрин суңһвр давулхин туст кесг бүрдәцлә бооцас батлгдсн бәәнә. Тенд дунд «БиднХамдан» дөңнлһнә штаб, «Әрәсән баһчудын ниицән» олна бүрдәцин региональн әңг, Хальмгин профсоюзмудын Федерац болн талдан кесг бүрдәцс мөн. Терүнәс нань Олна Палат «Негдсн Әрәсә» болн «ЛДПР» партьслә нөкцлтин бооцас бас батлв.
Таңһчин Олна палатын Ахлач Мучан Батырин темдглсәр, батлгдсн бооца күцәлһнә йовудт деер келгдсн бүрдәцслә хамдан бүртклһнә, тооллһна болн аш дигллһнә керг-үүлдврмүд давулгдхмн. Тер мет хамцу үүлдврин йовудт дамшлтарн хувалцҗ, барин көдләчнрлә залһлда бәрҗ, нань чигн кесг харһлтс бүрдәлһнә көдлмш бас күцәгдх болҗ зуралгдҗана.
Ашлад келхлә, сүл арвн хойр җилин туршарт олна бүртклһнә көдлмш улм делгрәд, кесг арвад миңһн күн эн керг-үүлдврт орлцдг болв. Өдгә цагт тогтсн бәәдлд эн керг эрк биш чинртә болҗана», гиҗ суңһврин йовудыг бүртклһнә Олна штабин шинҗләч Дәкин Раиса темдглв.
Мана зәңгч