Өрк-бүлмүдиг дөңнәд

«Демографь» гидг келн-улсин төсвин «Үрнь төрсн цагт өрк-бүлд демин мөңг өглһн» гидг шаңһа көтлврин медлд эн җил 377 өрк-бүл экин сертификатын мөңгиг олзлв.

Ут тоодан эдн 38,9 сай арслң авв. 2012 җилин туула сарин 1-әс авн 2026 җилин бар сарин 31 күртл һурвдгч эс гиҗ дарук үрнь һарсн болхла, өрк-бүл таңһчин сертификат авх зөвтә. Региональн сертификатын кемҗән 2019 җилин туула сарин 1 күртл олн үртә болсн болхла 80 миңһн 490,71 арслң, кемр тиим зөв 2019 җилин туула сарин 1-әс авн учрсн болхла 123 миңһн 774,95 арслң тогтана.
Экин региональн сертификатын мөңгиг гер-бүүрин таал ясруллһнд, һазрин әңг хулдҗ авлһнд, инженерн сурвлҗ оруллһнд, бичкдүдин сурһульд болн эмнлһнд, герин ясврт олзлҗ болхмн. Хальмг Таңһчин залврин Ахлачин дарук-таңһчин социальн делгрлтин, күч-көлснә болн көдлмшәр тетклһнә министр Өлзәтин Маринан темдглсәр, өрк-бүлмүд сертификатын мөңгиг нурһлҗ гер-бүүрин таал ясруллһнд болн ясврт олзлна. 2024 җилин эклцәс авн 275 өрк-бүл экин сертификатыг гертән ясвр келһнд кергтә тосхлтын материалмуд хулдҗ авлһнд болн ясвр кесн көдлмшин һару даңцалһнд олзлна гиҗ министр темдглв.
Батан Сәәхлә