Татарстан Республиклә бооцас батлгдв

27-08-2024, 11:10 | Общество, Таңһчин зәңгс, Хальмг Тањєчин Толєачин ґдр-бўр, Зіњг

Ноха сарин 24-д мана таңһчд Татарстан Республикин Толһач Рустам Минниханов керг-төрин халхар ирв. Хальмгин Толһач Хаска Бату күндтә гиичиг бүләнәр тосч, нөкцлтин туст кесг төрәр күүндв.
Өдгә цагт Татарстан Республик экономикин халхар сән йовудтаһар делгрҗәдг орн-нутгин регионмудын тоод орна. Тенд нефтин, химийин, маши тосхлһна, селәнә эдл-ахун, то-дигин эв-арһсин, медицинск кергсл кеҗ һарһлһна болн талдан халхс өргнәр делгрҗ йовна.
Эндр Татарстан Республикин болн Хальмг Таңһчин хоорнд эд-таврин эргцин кемҗән 30 сай шаху арслң тогтана. Татарстан мана таңһчиг медицинск шишлң кергсләр болн хулд-гүүлгәнә олн зүсн эд-таврар болн эдл-уушар теткнә. Тер мет маши тосхлһна халхар, киитрүлдг кергсләр тетклһәр болн то-дигин эв-арһсин туст нөкцлтхәр белн бәәхән Рустам Нургалиевич медүлв.
– Экономикин, сойлын болн социальн халхар кесг бооца батлвидн. Хойр республикүдин хоорнд нөкцлт цаарандан делгрәд бәәхд иткҗәнәв. Тер мет мана таңһчд тосхгдҗадг агропромпаркин бүрдәлһнд Татарстан Республикин дамшлтыг олзлҗ болҗана. Терүнәс нань Элстәс Хазн балһсн күртл урдк кевәр авиазалһлдаг дәкнәс эклхәр күүндвидн, – гиҗ Хаска Бату темдглв.
Тодлхас, эн җилин эклцәр таңһчин Толһач Хаска Бату Татарстан Республикд көдлмшин халхар одсн билә. Тиигхд хойр республикүдин толһачнр нөкцлтиг делгрүлхин тускар күүндсн болдг. Тер йовлһнд Бату Сергеевич Татарстанд зуульчллһн сән йовудтаһар делгрҗәхинь ил үзв, тегәд дамшлтынь Хальмгт олзлхар шиидсн билә.
Манад гиичллһнә йовудт Рустам Минниханов Н.Н.Пальмовин нертә Келн-улсин музейд одад, Хальмгин тууҗла болн сойлла өөрхнәр таньлдв. Тер мет Бурхн Багшин Алтн сүмд орҗ, шар шаҗна тууҗар соньмсч, тенд мөргәд һарв.
Келхәс, Рустам Нургалиевич Хальмгин Толһач Хаска Батун эк нег һазра Фирюза Шарифуллаевнала таньлдв. Харһлтын йовудт Рустам Минниханов энүнд Хазн балһснд гиичлҗ ирхиг үрвр кев.
Иим кевәр Татарстан Республикин болн Хальмг Таңһчин хоорнд нөкцлт улм делгрҗ, эврә экономикин халхд бәәтхә цуг орн-нутгин делгрлтд тәвцән орулхнь лавта.

КАРСАНА Евгения

Видео