Курск мүҗд дөңгән күргхәр

02-09-2024, 12:43 | Таңһчин зәңгс, Зіњг

Мана таңһчин улс Курск мүҗд амр биш бәәдлд туссн әмтнә төлә буйнч седкләрн кергтә тоот цуглулад, теднд дарани дөңгән илгәв. Урҗ өдр 15 тонн хот-хол, хувцн, эм, көнҗл, дер, канцелярск болн талдан эд-тавр ачсн хойр ик машин Курск мүҗ темцҗ Элстәс һарв.
Хальмгин залврин зәңглсәр, керглгдҗәдг тоот цуглуллһнд таңһчин хазнас мөңгн бас йилһгдв. Тер мет «БиднХамдан» олна штаб, «Zа наших 08» саң болн таңһчин олн бүрдәцс тәвцән бас орулсинь темдглх кергтә.
«Дәәч» спортын болн төрскнч баһчудыг өскдг төвин дамшач, СВО-д орлцач Ээнән Андриана келсәр, Әрәсә ик, алдр орн-нутг, амр биш таалд туссн улст бидн даңгин нөкд болнавидн. Тегәд иим буйнч кергт эрк биш орлцх зөвтәвидн, гиҗ эн темдглв.
– Курск мүҗд бәәдг улсла зовлңгинь хувалцҗ, дөңгән күргхәр шунҗанавидн. Тенд тогтсн бәәдл шулун гидгәр төгсч, эвин таалд хүвртхә, гиҗ бидн цуһар зальврнавидн, – гиҗ СВО-н ветеранмудын ассоциацин һардач Чумуда Николай тоолвран медүлв.

БАДМИН Занда