Чинртә сүүрт орлцв

Шидр Хальмг Таңһчин Толһач Хаска Бату «Негдсн Әрәсә» партин хүүвин сегләтрин үүлиг цаг зуур дааҗадг Владимир Якушевин болн Әрәсән гегән-герлин министр Сергей Кравцовин һардврт сурһуль-эрдмин бүрдәцсин бат ясвр күцәлһнә болн тосхлтын төрәр болсн сүүрт орлцв. Терүнд сурһулин шин җилд ирлцңгү бүрдәцс яһҗ белдгдснә тускар күүндвр болв.
Мана таңһчин әмтн ик зууднь селәдәр бәәнә. Энд дунд сурһуль бәәхлә, энд көдләд бәәҗ болна гиҗ тоолгддг. Сүл хойр җилин туршарт Хальмгт 47 сурһуль ясгдв. Энүг шаңһа төв бас темдглснь байрта йовдл болв.
Бат ясвр күцәгдсн сурһульмудт сурхд ода таалта болв, энүнә тускар сурһульчнр эврән келнә. Элст балһсна 20-ч тойгта сурһульд сурчадг Данир Шатуреновин келсәр, сән медрл авхин төлә ирлцңгү таал тогтагдв. Нег үлү эн бат ясвр сурһулин 35 җилин өөнд сән белг болҗана гив.
Тер мет таңһчд шар шаҗна сурһаль бас делгрҗәнә. Тенд таңһчин Шаҗн Лам Тензин Чойдак багшлна.
– Хальмг Таңһчд бат ясвр күцәлһнә көтлвр сән йовудтаһар давҗана. Ирх җилд Элстд шар шаҗна нарт-делкән ик хург болхмн, терүнд ирсн гиичнр мана делгрлтиг ил үзҗ чадхмн. Терүнәс нань шаңһа көтлврмүд болн келн-улсин төсвс үүдәхләрн делгрлтин шишлң көтлвр күцәгдҗәдг регионмудыг учртан авхиг седвәрән оруллав. Мана регионд оньган даңгин тусхаҗадг Әрәсән Президент Владимир Путинд болн орн-нутгин Залврт таңһчин бәәрн улсин нерн деерәс ханлтан өргҗәнәв, – гиҗ Бату Сергеевич ашлв.

ОЛЬДАН Цаһан