Бичкдүдиг сурһульднь белдв

Сурһулин җил эклхин өмн райодт болн Эст балһснд үүлддг таңһчин әмтнә социальн теткврин хамцу төвмүд «Бичкдүдиг сурһульднь белдхд дөң болтн» гидг буйнч седклин керг-үүлдвр бүрдәнә.
Олн җилин туршарт давулгдҗадг эн керг сән авъяст тохрв гиҗ келҗ болҗана. Таңһчин күч-көлсч бүрдәцсин көдләчнр, арһлачнр, селәнә эдл-ахус эн кергт шунмһаһар орлцҗ, олн үртә, баһ тетквртә, җирһлин күнд таалд туссн өрк-бүлмүдин бичкдүдт сурһульднь кергтә хувц-хунр, эд-тавр хулдҗ овад демән күргнә. Цергә шишлң керг-үүлдврт орлцҗ йовх улсин бичкдүдт бас онц оньг тусхагдҗ, сурһулин җилин өмн өргнд белг бәрүлҗ өггднә.
Целинн района әмтнә социальн теткврин хамцу төвин һардач Азыдан Байртан келсәр, эн җил баһ тетквртә 89 өрк-бүлд бичкдүдән сурһульднь белдхд дөң күрггдв. Ут тоодан 129 сурһульч, тер тоод түрүн болҗ сурһульд орх 72 күүкн-көвүн олна дөң-демәр канцелярск эд-таврар теткгдв. Эн өрк-бүлмүд социальн теткврин төвин хәләврт бәәнә, тегәд эднә җирһлднь учрсн олн зүсн төрмүд хаһллһнд орлцҗ, олн төрмүдәр күүндврмүд давулгдна. Целинн района сурһулин бүрдәцсин, дотр-дундын кергүдин, прокуратурин, зарһин, цергә комиссариатын, мөшклһнә әңгин, түүмр унтралһна цергллтин көдләчнр җил болһн эн кергт орлцҗ, бичкдүдт сурһульднь кергтә эд-тавр хулдҗ өгнә. Бәәрн арһлачнр Абушина Светлана, Меклән Гарма, Никитинә Айс җирһлин күнд таалд туссн бичкдүдт бас белгән бәрүлнә, гиҗ Байрта Бембеевна темдглнә.
Шидр района КЦСОН-а улд болсн харһлтд бичкдүдиг сурһулин шин җиллә йөрәҗ, күцәмҗ дурдҗ, белг бәрүлҗ өгв. Нег үлү түрүн болҗ сурһульд орҗах күүкд-көвүдт олн әмтнә дөңгәр цуглулсн белг байр үүдәҗ урмдулв.
ДООҖАН Наталья
ЗУРГТ: «Бичкдүдиг сурһульднь белдхд дөң болтн» гидг буйнч седклин керг-үүлдврт орлцачнр