Терроризмиг гетлхин төлә

Һаха сарин 3-д мана орн-нутгт терроризмиг гемтллһнә Өдр темдглгднә. Ар Осетин Беслан балһсна дунд сурһульд 2004 җилд һурвн өдрин туршарт сурһульчнриг, багшнриг болн эк-эцкнриг бәрәнд авад, кесгиннь әмнд күрснә ашт һурвн зун һар күн, теднә тоод 186 күүкн-көвүн әмнәсн хаһцв.

Террористическ йовдл мана орн-нутгин күн болһна зүркнә өвдкүр болҗ терроризмәс саглуллһна кергт күчән негдүлҗ үүлдхд цугтаһинь хамцулв. Тер һашута йовдл учрад ода дигтә 20 җил болв, тер бийнь өөрхн улсан геесн улсин төлә эннь һашудлһна өдр болҗ үлдв. Одахн Әрәсән Президент Владимир Путин Ар Осетин Беслан балһснд керг-төрин халхар одҗ, «Город ангелов» гидг санлын бумблвд оршагдсн бичкдүдин, багшнрин болн эк-эцкнрин санл тевчв.
- Эн һашута йовдл цуг Әрәсән улсин төлә эдгшго шарх болҗ үлдх. Зовлң үзсн улст, тадна өрк-бүлмүдт, күн болһнд эврәннь үрән геесн улст энтн җирһлин туршт шарклх өвдкүр болх. Бидн эн өдр шишлң цергллтсин дәәчнриг тодлҗ, эдн бичкдүдиг харсхин төлә эврәннь әмән әрвллго залу-зөрмгән үзүлсиг темдглнәвидн. Мана хортн мана орн-нутгиг дәәләд, энд цүүгә болн нәрн бәәдл тогтаҗ, олн-әмтнә ниицлтиг, төвкнүн җирһлиг эвдхәр седҗәнә. Терроризмәс сагллһна кергиг күцәҗәдг төләд эндр бидн Курск мүҗд, Донбасст болн Новороссьт дигтә-дарата бәәдл тогтахар шунҗанавидн. Аш сүүлднь неонацизмиг бас уга кехвидн, - гиҗ Владимир Путин «Беслана экнр» гидг олна ниицәнә гешүдлә болсн харһлтд темдглв.
Терроризмиг хөрлһнә Өдр бидн мана орн-нутгт учрсн террористическ йовдлын ашт әмнәсн хаһцсн улсин санл тевчнәвидн. Эн өдр Москва, Санкт-Петерубург, Первомайск, Буденновск, Волгодонск болн цуг орн-нутгин балһсдт санлын керг-үүлдврмүд болна. Эн өдр сурһуль-эрдмин бүрдәцст терроризмиг хөрлһнә төрәр кичәлмүд, харһлтс болна, бичкдүдт болн баһчудт залу-зөрмгән үзүлсн улсин тускар келҗ өгнә.
Сүл цагт кесг орн-нутг Әрәсәд харшлтан күргҗ, хар сана зүүҗ, хаслһна керг-үүлдвр күцәҗ, мана үлмә уга болн төвкнүн бәәдлиг эвдхәр седнә. Мана орн-нутгин Президент Владимир Путинә келсәр, бидн ниитә болхла, мана Әрәсәг кен чигн диилҗ чадшго.

БАТАН Наталья