«Өөрднрин» би өөдәнәр үнлгдв

Хальмг бииһин» «Өөрднр» театр регионмуд хоорндк үүдәгч XIII наадмд орлцв. «Русское поле» гисн нерәдлһтәһәр болсн тер наадм Әрәсән цуг балһсдар болсмн.
«Коломенское» гидг Московск музей – заповедникин бәәрнд ноха сарин 31-д регионмуд хоорндк үүдәгч XIII наадм болв. Славянск билг-эрдмин «Русское поле» гидг эн ик байр орн-нутгин сойлын җирһлд темдгтә йовдл болсн деерән Европд хамгин ик кемҗәтә үүлдвр болҗ тоолгдна.
«Бат өрк-бүл - орн-нутгин түшг» гидг дуудвртаһар эн җилә наадм давв. Җил болһн энүнә олн зүсн талвңгудт һурвн миңһн һар артистиг цуглулна. Ду-бииһин эрдмлә таньлдсн деерән наадмд ирсн әмтн урн һарин эрдмин үүдәврмүдиг үзнә, мастер-класст орлцҗ, бийднь таасгдсн эрдмлә өөрхн таньлдна. Олн-зүсн эд-тавр кеҗ һарһдг эрдмчнр чигн эн керг-үүлдврт орлцна. Эн җил Әрәсән 60 регионас тиим эрдмчнр эврә кегдлмүдән үзүлҗәнә.
Эн ик кемҗәтә наадмин ашар «Өөрднр» театр жюрин шишлң мөрән лауреатнр болв. Хальмг театрин «Ожившая легенда» болн «Старинная фотография» гидг хореографическ үүдәвриг жюри йир өөдән үнлв. Нәдвдә Владимир белдсн эн үүдәвр «Хореографическ өвәрц шиидврин болн терүг бүтәлһнә күцәмҗин төлә» гидг шишлң мөрәһәр темдглгдв. Хальмг хореограф Нәдвдә Владимирин седвәртә үүдәгч үүлдвр тиигҗ өөдән үнлгдв. Хореографин ухалҗ һарһсн тоотынь бииһин дөңгәр эвтә сәәнәр үзүлсн театрин коллективин тиим өөдән күцәмҗ таңһчин нериг дуудулҗахнь маһд уга.
ҖИРҺЛИН Кермн