Хальмг баатрин санлынь тевчв

Сурһулин шин җил эклсн түрүн өдртнь Ростовск мүҗин Азовск района сурһульмудт байрин керг-үүлдврмүдин йовудт нег һазра мана баатр Павел Гирдиковин санлынь тевчв. Дәәнә цагт мел тер һазрт дәәлдҗ йовсн нег һазра мана залу зөрмгәрн ончрад әмнәсн хаһцв.
Элст балһсна толһачин үүлиг цаг зуур дааҗадг Максим Сорокин, Хальмг хазгудын бүрдәцин одмн, таңһчин Толһачин селвгч Җаңһан Чимид, энүнә дарук Нахошкинә Мингиян, Элстин 15-ч тойгта дунд сурһулин багш Басхан Алия болн баатрин өөрхн элгн-саднь Хальмгин делегацин ханьд орв.
1943 җилин лу сарин 11-д Павел Гирдиков 110-ч мөртә хальмг онц дивизин ханьд Ростовск мүҗин Азовск района Новоалександровка күүтрин сулдхлһнд орлцад, баатр кевәр дәәлдәд, әмнәсн хаһцсн билә.
Керг-үүлдврт орлцачнр Новоалександровка селәнд Төрскән харсгч Алдр дәәнә баатрмудт нерәдсн бумблвд бәәдг салдсмудын үкәрт ирҗ, гүрмр цецгүд тәвҗ, теднә санлынь тевчв. Дарунь селәнә сурһульд П.Гирдиковд нерәдәд углҗ тәвгдсн санлын самбрт бас цецгүд тәвв. Тер мет Павловск болн Кулешовск дунд сурһульмудт бас одв. Кулешовск 17-ч тойгта дунд сурһуль болхла хальмг дәәч Павел Гирдиковин нер зүүнә.
– 2025 җилд бидн Алдр Диилврин 80 җилин өөн темдглхвидн, тегәд Тең һолын көвәд бәәдг улс хальмг баатрин туск санлыг әрүн кевәр хадһлҗ йовсинь темдглҗ ханлтан өргҗәнәв. Хам-хоша бәәдг бидн кезә чигн нег-негән дөңнәд, ахнр-дүүнр мет үүрләд, ниитәһәр бәәх зөвтәвидн, – гиҗ Максим Сорокин келсн үгдән онц темдглв.
Павел Гирдиковин дүнь Нәдвдә Константинә келсәр, ахиннь үкәриг эдн 64 җилдән хәәсн бәәҗ. 2009 җилд Ростовск мүҗин Азовск района Новоалександровка селәнд эн оршагдсинь илдкв. Салдсмудын үкәрт 92 күн оршагдв, зуг Павел Гирдиковин болн Виктор Чистяковин хойр күүнә нер илдкҗ авсн билә. Хөөннь болхла хәәврин ик көдлмш кегдәд, талдан салдсмудын нерд илдкгдәд, теднә нердинь бичәд, санлын самбр углҗ тәвгдв.
2012 җилд Тең һолын көвәд болсн дәәлдәнә 70 җилин өөнд нерәдәд, Павел Гирдиковиг «Төрскнәннь, Тең һолын болн итклин төлә» медаляр ачлҗ, элгн-саднднь бәрүлҗ өгсн билә. Тер мет 2020 җилд «Залу-Зөрмгин» медаль бас хальмг баатрин өөрхн улстнь илгәгдв. Дорас өсч йовдг баһчуд орн-нутгин тууҗан, олна Диилврин төлә әмән өгсн нег һазра баатрмудын нердинь медҗ, төрскнч седклтә улс болҗ өсхд иим керг-үүлдврмүд туслна.
КАРСАНА Евгения