Хө кирһлһнә ашинь диглв

Яшкулин района «Улан хөөч» тохма мал өскдг эдл-ахуд хөд кирһлһнә ашинь диглв. Хальмг Таңһчин селәнә эдл-ахун министр Гаван Тимур ончрсн көдләчнриг темдгләд ачлв.
Таңһчин эдл-ахусин ик зунь хөд өскнә. Эн җилд хөд өсклһнд шаңһа дем болҗ 120 сай арслң йилһгдв. Урдк җилин кемҗәнәс эннь хойр холванд ик мөңгн болв, гиҗ темдглх кергтә. Мана таңһчд хөрн эдл-ахуд хө өскнә. Хөөдин болн ямадын тооһарн мана регион Әрәсәд хойрдгч орм эзлнә, ЮФО-д болхла нүүрләчин тоод йовна. Тер мет орн-нутгт кирһгддг ноосна арвн процентнь Хальмг Таңһчд авгдна.
Эн җил таңһчд ут тоодан 855 хөн кирһгдәд, 2,4 миңһн тонн ноосн авгдв. Кирһлһнә кемин ашар «Первомайский» СПК ПЗ, «Улан хөөч» АО ПЗ болн «Черноземельский» АО ПЗ нүүрләчнрин тоод орв. «Улан хөөч» АО ПЗ-д көдлҗәдг хөөчнр Эрднин Дорҗ, Курбан Курбанов болн Булат Курбанов үнтә белгүдәр ачлгдв.