Малын эмчнриг йөрәҗ ачлв

Шидр малын эмчин сән өдрт нерәдсн байрин хургт Хальмгин залврин дарук, йиртмҗин көрңгин болн эргндк бәәдл харлһна министр Җамбинә Очр, таңһчин селәнә эдл-ахун министр Гаван Тимур, Хальмг Таңһчин ветеринарн заллтын һардач Санҗин Виктор болн ирлцңгү бүрдәцсин көдләчнр орлцҗ йөрәв.

Байрин хург Олна дөңнлтин штабд болв. Мана таңһчд малын эмчнрин эрдм өөдән чинртә болдг, тер юңгад гихлә мал өсклһн мана экономикин делгрлтин һоллгч нег халхнь болна. Хургин йовудт ончрсн көдләчнриг, нег үлү баахн мергҗлтнриг темдглҗ ачлв.
– Ветеринарн цергллт селәнә эдл-ахун халхд һоллгч орман эзлнә, тер юңгад гихлә АПК-н көдләчнр таңһчин малчнрла бат залһлда бәрҗ көдлнә. Тер мет цаг-болзгтнь керглгдҗәдг керг-үүлдврмүд давулҗ, малыг олн зүсн гемәс гетлнә, гиҗ Гаван Тимур көдлмшинь онц темдглҗ, ирлцңгү бүрдәцсин көдләчнриг йөрәв.
КАРСАНА Евгения