Шин көлг һарһҗ өгв

Шидр таңһчин дотр-дундын кергүдин министерствин медлд бәәдг әңгүдт шин көлг һарһҗ өгв. Керг-үүлдврин эклцәр Хальмгин дотр-дундын кергүдин министр, полицин полковник Дмитрий Григорьев ноха сарин 27-д хальмг милиц бүрдснәс авн темдглгдсн 104 җилин өөнлә йөрәҗ, ведомствин ончрсн көдләчнриг И.Д.Путилинә нертә медаляр, Әрәсән МВД-н Күндллһнә һашгудар, Ханлтын бичгүдәр болн талдан темдгүдәр ачлв.
Тер мет материальн-техническ улыг ясрулхин болн нег һазра улсиг ирлцңгү түргн көлгәр теткхин төләд министр Д.Григорьев «УАЗ Патриот», «Нива Тревел», «Лада Гранта» тамһта шин 42 машинә түлкүр МВД-н көдләчнрт бәрүлҗ өгв. Көлгнә техническ шинҗллт күцәгдҗ, дотрнь керглгдҗәдг цуг тоотар теткгдв. 42 машин таңһчин министерствин болн полицин территориальн әңгүдин эдлврт бәәхмн.
ОЛЬДАН Цаһан