Сән-сәәхн иргчин төлә дууһан өгв

10-09-2024, 10:58 | Общество, Таңһчин зәңгс, Зіњг

Таңһчин суңһврин комиссин зәңглсәр, түрүңк өдрин үдин хөөн 17 һар процент суңһачнр Элстд болн райодар дууһан өгв, бүклдән болхла таңһчин суңһачнрин то 200 һар миңһн күн болна.
Түрүн өдр, һаха сарин 8-д, бидн Элстин олн салврта гимназин герт бәәршлҗәсн 48-ч суңһврин әңгд ирвидн. Энд суңһачнрин то баһ биш билә, нам зәрмснь чеерүдт зогсчала. «Мана әңгд суңһвр дигтә-даратаһар давҗана. Суңһачнр таңһчин Толһачиг болн Элст балһсна депутатнриг суңһҗана.
Мана участкд КОИБ кергсл олзлгдҗана. Тегәд суңһачнрин ду түргәр тоолхин төлә сән таал тогтагдв»,- гиҗ әңгин ахлач Саман Елена келв.
Эндр түрүн өдр болв чигн суңһачнр шунмһаһар орлцҗана, өрк-бүләрн чигн әмтн ирнә, дундын болн баһ наста улс олн. «Би түрүн өдрлә дууһан өгхәр шиидүв. Амрлһна өдрмүдт күцәх керг бас дала. Элгн-садтаһан нааран ирүв. Бидн цугтан му биш бәәнәвидн. Мана ачнр-зеенр көдлҗәнә, зәрмнь сурчана, тааста эрдмән дасчана. Мана таңһчин әмтнә җирһл цааранднь чигн улм ясрад йовтха, мана таңһчин һардвр улм ик керг түүнә төлә күцәтхә, Элст балһсна Хургин депутатнр теднд дөңгән күргәд бәәтхә, мана хальмг хотл балһсна бәәдлнь улм сәәхртхә гиһәд бидн дууһан өгчәнәвидн»,- гиҗ ачта амрлһнд бәәдг суңһач, урднь багшар көдлҗәсн Һәрән Валентина тоолврарн хувалцв.
Тер мет 48-ч суңһврин әңгд Сангаджиевихнә өрк-бүл ирв. «Мана таңһч улм делгрәд йовтха, улм икәр гермүд, сурһульмуд, садмуд, шин хаалһс тосхгдтха, дорас өсч йовх үйнрин төлә цуг таал тогтатха. Түүнә төлә бидн дууһан өгчәнәвидн»,- гиҗ Занда Ивановна тоолвран келв.
Тер мет КПРФ-ин, ЛДПР-ин, «Негдсн Әрәсән» болн нань чигн партьсин бүрткәчнр суңһврин йовудыг шинҗлв. «48-ч тойгта әңгд суңһвр давулгдҗана, әмтн байрта-бахта бәәнә, зәрмнь хальмг келн-улсин хувцан өмсч иргнә даалһвран күцәҗәнә. Би бас урдаснь түрүн өдр дууһан өгчкләв. Ода таңһчд кесг сурһульмудт бат ясвр кегдв, багшнрин күч-көлснә таал ясрҗана, тернь күүкдт, теднә эк-эцкнрт таасгдҗана, тер кергиг таңһчин һардвр күцәтхә, мана җирһл ясрад йовтха гиҗ дууһан өгләв», - гиҗ «Негдсн Әрәсә» партин бүрткәч Чокан Зоя келв. Хойр өдрин эргцд бүклдән таңһчар цуг суңһачнрин 47, 7 процент күн дууһан өгчкв. Тиим кевәр мана таңһчин иргнмүд суңһврт шунмһаһар орлцҗана.
Цааранднь келхлә, таңһчин Олна палатын олна штаб суңһврин йовудыг бас бүрткв. «Эндр ик чинртә өдр болҗана, мана суңһачнр шунлттаһар эн дааврта керг-үүлдврт орлцҗана. Кесг әңгүдт суңһвр ямр йовудтаһар давҗахин тускар бидн штабд углҗ тәвсн видеобүртклһнә кергслмүдт үзҗәнәвидн.
Баһчуд олар суңһврин әңгүдт ирҗ дууһан өгчәнә, тер йовдл мадниг байрлулҗана. Тиим кевәр эдн эврә хәләцән олнд медүлҗ, мана таңһчин делрглтд эврә тәвцән орулҗана.
Түрүн болҗ дууһан өгчәх суңһачнрт зәрм әңгүдт белгән бәрүлнә. Өрк-бүләрн чигн әмтн ирнә, яһад гихлә ах үйин улсин төлә суңһвр олна ик байр болҗасмн, ода чигн эдн тиигҗ өргмҗтәһәр эн олна керг-үүлдврт орлцҗана, түүнд ачнр-зеенрән орлцулҗана. Тиигҗ эдн эврә өрк-бүлин сән иргчин төлә дууһан өгчәнә.
Орн-нутгин Олна палатмудын тиим олна бүртклһн 2018 җиләс авн күцәгдҗәнә. Тер кемд олна бүртклһнә штабмуд секгдлә, олна бүрткәчнр үүлдврән экллә. Ода мана таңһчд чигн суңһврин йовудыг бүртклһнә олна штаб таңһчин цуг райодын болн Элстин 42 әңгин көдлмшиг бүрткҗәнә, талдан әңгүдт видеокергсмүд көдлҗәнә, тернь олна партьсин болн негдлтсин, иргнмүдин ниицәнә бүртклһн болҗана. Олна палатд сурһмҗ авсн бүрткәчнр бас цуг әңгүдт суңһврин йовудыг шинҗлҗәнә»,- гиҗ Олна штабин шинҗләч Манҗин Элеонора келв.
Суңһврин цуг йовуд дигтә-даратаһар давв, Олна штабин шинҗләчнр ашлвр кев.
Ик наста медәтнр болн шалтгта улс гертән дууһан өгв, түрүн өдр теднә то 2 миңһнд күрв. Комиссин гешүд болн бүрткәчнр тедн тал һарч йовв. Бүклдән таңһчар 227 суңһврин әңг болн 862 бүрткәч көдлв.

ТҮРВӘН Һуна

Видео