Мана таңһч өсәд-өргҗәд йовтха!

Давсн басң өдрәс авн нарн өдр күртл мана орн-нутгт, тер дотр мана таңһчд, суңһвр болв. Хальмг Таңһчин улс региона толһачиг болн Элст балһсна Хургин депутатнриг суңһв. Һаха сарин 6-д өрүн 8 часла цуг орн-нутгт суңһврин әңгүд секгдв. Мана таңһчд ут тоодан 227 суңһврин әңг көдлв.

Элст балһснд көдлсн 42 суңһврин әңгд элстихн түрүн өдрәснь авн дууһан өгв. Суңһврин көдлмш яһҗ давҗахинь медхәр нарн өдрлә тиигәрән йоввидн.
Эрднин Пүрвән нертә Элстин 23-ч тойгта дунд сурһульд негдгч болн хойрдгч суңһврин әңгүд көдлв. Эн җил сурһулин бүрдәцд бат ясвр күцәгдв, сән таалта сурһулин шинрүлгдсн герт энд суңһачнран тосв. Суңһврин хойрдгч тойгта әңгин ахлач Бадм-Хаалһин Натальян келсәр, басң өдр өрүн эртәс авн Хальмг Таңһчин Толһачин болн Элстин Хургин депутатнрин төлә дууһан өгхәр медәтнр чигн, баһчуд чигн олар ирв. Эн әңгд 18 нас күрсн һурвн күн түрүн болҗ суңһврт орлцв. Тер мет суңһачнр дунд хамгин ах гиснь найн долата медәт болв. Зәрм улс өрк-бүләрн, бүкл уульнцарн чигн суңһврт ирснь темдгтә. Һурвн хонгтан эн әңгд суңһврин комиссин арвн күн болн һурвн бүрткәч көдлв.
Хальмгин селәнә эдл-ахун министр Гаван Тимур олн суңһачнр дунд хойрдгч әңгд ирҗ дууһан бас өгв. Тодлхас, Тимур Сергеевич эврә цагтан Элстин 23-ч тойгта дунд сурһулиг төгсәсмн.
– Суңһврин кем орн-нутгин иргнә төлә дааврта керг болдг. Итклтә кандидатын төлә күн болһн дууһан өгнә. Зуг зөрсндән күрхәр седдг күн суңһврт орлцх зөвтә, – гиҗ Гаван Тимур тоолврарн хувалцв.
– Хаврар болсн орн-нутгин Президентин суңһврла дүңцүлхлә, эн суңһвр невчкн йилһрв, әмтн адһм угаһар нег-негнләрн ухан-тоолврарн хувалцад күүндәд бәәснь үзгдв, – гиҗ Наталья Геннадиевна темдглв.
Элстин 12-ч тойгта дунд сурһульд бәәршлсн 34-ч әңгд арһлач болн модельер Хаска Елена дууһан өгв. Энүнә келсәр, эн дааврта керг-үүлдврт орн-нутгин иргн болһн орлцх зөвтә. Һаза дулан болв, тегәд теңгрин бәәдл чигн суңһачнриг байрлулв. Мана орн-нутг, нег үлү Хальмг Таңһч, өдр ирвәс делгрәд йовхинь олн-әмтн ил үзҗәнә. Өдгә амр биш цагт Әрәсән иргнмүд негдәд, өмәрән зүткҗ йовна. Дорас өсч йовдг мана үйнрин төлә, олна кергин болн Диилврин төлә күн болһн суңһврин әңгд ирҗ дууһан өгв, гиҗ Елена Васильевна келв.
Суңһврин сүл өдрин асхн «Калмыкия» РИА-н барин төвд суңһврт орлцсн политическ партьсин һардачнр цуглрҗ, седкүлчнрин төлә брифинг давулв. Давсн суңһврин тускар ухан-тоолврарн хувалцҗ, седкүлчнрин сурврмудт эдн хәрү өгв.
«Негдсн Әрәсә» партин региональн әңгин сегләтрин дарук Артем Михайловин темдглсәр, тавн җил хооран болсн суңһврт ирсн әмтнә то невчкн баһ бәәсмн. Эн җилд болхла, суңһачнрин то өсв. Энүнәс иштә нег һазра улс эндрк йоснд иткҗәхән медүлҗәнә гив.
– Суңһврин керг-үүлдвр сән йовудтаһар давсмн. Белдврин ик көдлмш күцәгдсинь онц темдглх кергтә, – гиҗ КПРФ-ин һардач Нуура Николай тоолврарн хувалцв.
Пенсионермүдин партин һардач Бован Санлын цәәлһсәр, суңһвр ямр чигн боомтг угаһар давв. Суңһвр угтҗ, олн-әмтнлә харһад, тедниг үүмүлҗәдг төрмүдәр күүндҗ, күн болһна селвгиг учртан авч көдлхәр шунҗанавидн гиҗ эн келв.
«ЛДПР» партин һардач Петр Вышкварокин темдглсәр, Хальмгт көдлҗәдг партьсин элчнр кен-негнәннь үгд орҗ, хоорндан ниитәһәр хамцу үүлдврән күцәхәр белн бәәхән иткүлсн болв.
«Новые люди» партин элч Саңһҗин Алдр суңһачнрин то өсчәхинь, суңһврин керг даавртаһар бүрдсинь темдглсн болдг.
Урҗ өдр асхн ора Олна дөңнлтин штабд болхла, «Негдсн Әрәсә» партин региональн әңгин сегләтр Хаска Бату партин гешүдлә харһв. Энүнә йовудт урдаснь кесн суңһврин ашинь дигләд күүндв. Харһлтд орлцачнр цуһар суңһврин йовуд сәәнәр бүрдәгдсиг темдглв.
– Эн суңһврт баһчуд олар орлцсиг онц темдглх кергтә. Тер мет суңһврин керг-үүлдвр бүрдәсн улст ик ханлтан өргҗәнәв. Эдн цуһар төрскнч седклтә, эврә һазр-усндан хару улс болҗана. Удл уга суңһврин ашинь дигләд, цаарандк көдлмшин зөрүллтинь йилһҗ авхмн, – гиҗ Бату Сергеевич товчлв.
Таңһчин райодт суңһвр бас сән йовудтаһар давв. Бәәрн улс бас өрк-бүләрн ирҗ, олна кергт орлцв. Кесгнь хальмг улсин хувцта, зәрмнь нам мөр унад чигн суңһврин әңг күртл довтлҗ ирв. Яшалтан районд болхла, һаха сарин 6-д өрк-бүлән өндәлһсн Александр болн Арина Павличевихн ЗАГС-т бәрмт цааснд һаран тәвн дарунь суңһврин әңгд ирәд, сән иргчин төлә дууһан өгсн болдг.
КАРСАНА Евгения