«Кеедә» бичкн хәләһәчнрт байр белглҗәнә

Бичкдүдин наадд тәвдг театрмудын наадм бүрдәх шиидвр Басңга Баатрин нертә Келн-улсин театр кесг җил хооран шиидсмн. Тер шиидврән күцәһәд, Хальмг театр ода дөрвдгч кемдән «Кеедә» гидг наадмд талдан һазрин театрмуд дуудҗ, театральн ик байр бүрдәҗәнә. Бичкдүдиг театрла баһ настаһаснь авн таньлдулсн деерән эн наадм улс хоорндк залһлдаг батлҗ, театрин дөңгәр үүдәгч нөкцл батлҗ, Әрәсән театральн үүлдәчнр дунд ик тааслт олҗана.
«Кеедә» эн җил дөрвдгч кемдән орн-нутгин болн өөр эргндк һазрин театрмудыг цуглулҗана. Эн җилә театральн наадмд Узбекистана, Дагестана, Хакасия Республикин, Сергиев Посад балһсна театрмуд Хальмгин хотл балһснд нааддан авч ирв. Хальмгин һурвн театр: Басңга Баатрин нертә Келн-улсин театр, драмин болн шог наадна Орс театр, «Җаңһр» наадһасин таңһчин театр бас эн наадмд бичкдүдт нерәдсн нааддан үзүлҗәнә. М. Щепкина нертә ах театральн күрәлңгин проректор Алла Шевелева наадмин цуг нааддыг хәләҗ, шалһачин хәләцән медүлхмн.
Ирсн гиичнр пресс-конференцд орлцҗ, авч ирсн нааддын тускар келҗ, коллективсларн таньлдулв. Бичкдүдт нерәдсн нааддын туск иим ик цуглраг бүрдәҗ, театрмуд хоорндан харһҗ, дамшлтарн хувалцхд, эврә билг-эрдмән талдан һазрин хәләһәчнрт үзүлх таал өгчәх «Кеедә» наадмин чинрин тускар Хальмг Таңһчин сойлын болн зуульчллһна министрин дарук Саңҗрга Герман, театральн шалһач Алла Шевелева, Басңга Баатрин нертә Келн-улсин театрин художественн һардач болн ах режиссер Манҗин Борис, ирсн театрмудын һардачнр седкүлчнрт келҗ өгв. Драмин болн шог наадна орс театрин һардач Виктор Хаптаханов болн «Җаңһр» театрин һардач Кеэмя Бередина наадмд ирсн гиичнриг йөрәһәд, үзүлх нааддын тускар келҗ өгв. Театрмудын иим хуралтс үүдәгч үүлдврт туста болдгиг, эн туст һарчах шин соньн тоотла таньлдх арһ өгдгинь эдн темдглв.
Нааддын хәләвр һаха сарин 11-д «По Шучьему велению» гидг наадар эклв. Сергиев Посад балһсна «Театральный ковчег» гидг драматическ театрин наадыг Элстин бичкн хәләһәчнр үзв. Даргинск көгҗмин-драматическ театрин «Проделки Чарлака» нааднла сурһульчнр таньлдв. Наадыг режиссер Сергей Бурлаченко белдҗ тәвсмн.
Азербайджана театрин хойр наадн һаха сарин 12-т үзүлгдлә. Эн өдр «Җаңһр» наадһасин театр «Карлик нос» гидг наадан үзүлв. Һаха сарин 13-д Узбекистана Ташкентск театр бичкн хәләһәчнрт «Муха Цокотуха» наад үзүлв. Драмин болн этническ көгҗмин Хакасин келн-улсин театр Элстин бичкн хәләһәчнрт эврә наадан үзүлсмн. Наадмин көтлврин ашлврт Басңга Баатрин нертә Келн-улсин театрин «Сказка о царе Салтане» гидг наадн одн хәләһәчнрин оньгт тусхагдв.
Басңга Баатрин нертә Келн-улсин театрин һардач Шуран Галинан келсәр, «Кеедә» наадмин һол күслнь бичкдүд дунд театрин туск медрл өгч, илвтә сәәхн эн билг-эрдмлә бичкдүдиг бичкнәснь дасхҗ, ке-сәәхниг медҗ авдг сойлын халхар медрлтә баһчуд өсклһн болҗана. «Эндр театрт ирҗәх күүкд-көвүд цаг давад, өсәд-босад, таңһчин йоста иргнмүд болхларн цуг халхин медрлтә болн шагшавдын чик сурһмҗ авсн улс болхнь маһд уга. Цуг энүнднь театрин нилч баһ биш. Тер дотр мана «Кеедә» наадм терүнд зөвтә тәвцән орулҗана», – гиҗ Галина Борисовна ашлҗ келәд, күцәмҗ дурдв.
«Кеедә» театральн наадм дөрвдгч кемдән бичкн хәләһәчнрт байр белглҗәнә.

ХӨӨЧИН Галина