Хамцу үүлдвр күцәмҗтә болхмн

Хальмг Таңһч болн Малайзий номин болн сурһуль-эрдмин, сойлын, тер мет нань чигн халхар нөкцлтән эклҗәнә. Тер тоод Хальмг ик сурһуль болн Малайзийин Путра ик сурһуль хамцу үүлдврән өргҗүлхәр зуралҗана. Эдн орс келнә төв Малайзийд секлһнә, оютнрин академин сольлцаг өргҗүллһнә, номин хамцу төсв күцәлһнә тускар онлайн таалд күүндвр кев. Хамцу көдлмшин түрүн керг-үүлдвр тернь болв. – Тиим нөкцлтд одахн Владивосток балһснд төгссн Дорд үзгин экономикин чуулһн нилчән бас күргв, – гиҗ хальмг вузин һардач Салан Бадм келв.
«Бидн мана хамцу бооцанд орх тоотын тускар күүндвр кеввидн. Түүнә өмн тиим нөкцлт эклх зөвиг хойр орн-нутгин ик сурһулин министерствсәс авлавидн. Тернь мана таңһчин бәәдл-җирһлин темдгтә йовдл болҗана. Мана эклсн күүндвр Әрәсән болн Малайзийин ик сурһульмудын һардачнрин харһлтын талвңгудт цааранднь кегдх», – гиҗ Бадм Катинович заав.
Владивосток балһснд болсн чуулһнд Әрәсән Президент Владимир Путин болн Малайзийин залврин Ахлач Анвар Ибрагим болн Китдин орн-нутгин Ахлачин дарук Хань Чжен орлцҗ, теднә орн-нутгуд хоорнд нөкцлтиг өргҗүллһнә төрәр күүндвр кев. Тиим кевәр сурһуль-эрдмин политикин төрмүдт нерәдсн харһлт хулһн сарин 9-әс авн 12 күртл Санкт-Петербургд болхмн, энд Хальмг ик сурһулин болн Малайзийин Путра ик сурһулин элчнр бооцаһан батлх. Эднд бидн күцәмҗ болн сән йовудта нөкцлт дурдҗанавидн.
- Хамгин түрүнд Малайзийин Путра ик сурһулин элчнр орс кел дасхлһиг өргҗүлхәр бәәнә. Мана Хальмг ик сурһулин һардвр талдан чигн салврар нөкцлтән шунһадулхар зуралҗана. Цуг эн тоотар хойр вузин һардачнр Санкт-Петербургд ашлгч күүндвр кеһәд бооца батлхмн.
Путра ик сурһульд IT халхар ик күцәмҗ бәрсн бәәнә, тегәд мана оютнр теднә дамшлтар үлгүр кеҗ компьютерин ном дасхла ик туста болхнь лавта. Талдан чигн олн халхар Путра ик сурһуль баһ биш шинҗллт кеҗәнә, Малайзийин хамгин сән вузмудын тоод эн орна, тегәд эднлә нөкцлт хойр халхин делгрлтд ик нилчән күргх, – гиҗ физикин, эсвин болн зәңгллһнә технологин дацңгин һардач Елена Сумьянова тоолвран келв.
Малайзийд ода 34 һар сай күн бәәнә. Эдн малайск келәр келнә. Англь келн, нег үлү бизнест өргнәр олзлгдна. Эн орн-нутгт җилин эргцд халун болна, хур-чиг чигн икәр орна. Малайзий Таиландла, Индонезийлә болн талдан орн-нутгудла хамцу меҗә эдлнә. Энд электротехник, зуульчллһн, компьютерин сольдг зи, чипмүд һарһлһн ик делгрлт авсн бәәнә. Тиим кевәр Малайзий делкән делгрлттә орн-нутгудын тоод орна, экономикин күчнь җил ирвәс өсәд йовна. Эднә һазрт Бурхн багшин ном, индуизм болн китд улсин даосизм гидг шаҗн делгрлт авсн бәәнә, болв түрүн орм ислам эзлҗәнә. Иим болв чигн номин болн өдгә цагин технологин кесг халхар Хальмг ик сурһуль болн Малайзийин Путра ик сурһуль нөкцлтән делгрүлҗ чадҗана. Нег үлү эндр Хальмг һоллгч вузд һазадын орна кесг оютнр олн зүсн эрдм дасчана, теднә тоод Малайзийин баһчуд немгдхлә, улм туста болхнь лавта.
Һазадын орна оютнрин негдлт хальмг вузд ик шунлтта үүлдвр күцәдг бүрдәц болҗана, цуг оютнриг батар хамцулна, теднд килмҗән өгнә, тегәд чигн Хальмг ик сурһульд һазадын орна оютнринь то икдәд йовна, эднә җирһлин болн сурһулин төлә цуг таал бәәнә. Һазадын орна оютнрт орс кел түргәр дасхлһна ик дамшлт хальмг вузд хоршагдла. Тегәд хойр вузин нөкцлтиг делгрүлхин төлә цуг таал бәәнә гиҗ лавтаһар келҗ болҗана.

ТҮРВӘН Һуна
Зургт: Путра ик сурһулин бәәшң