Эвцлдҗ болшго йовдл

Давсн долан хонг таңһчин әмтиг үүмүлҗ шуугулсн зәңг һарла. Орн-нутгин кесг лавкст, тер дотр «Леруа Мерлен» гидг гипермаркетд, нүр-һаран уһадг хораст кергтә эд-тавр хулддг лавкд Бурхн Багшин толһа зургдсн болн бурхна нань чигн әрүн тоотла залһлдата зургта кегдлмүд хулдгдҗахинь әмтн үзәд, терүгинь бурушагч тоолвран бичәд, социальн сүлҗәнә дөңгәр тиим йовдлыг уурулхинь нексмн.

Ик орн-нутгт бәәх саяд әмтнә итклинь бацсн йовдлын тускар бүкл өдрин туршарт Интернетд, барин һарцст, радио болн телеүзлин һарцст әмтн тоолврарн хувалцҗ, күн биш иим йовдлла эвцлдлго бәәхән әмтн медүлв. Зәңгллһнә технологийс ик делгрлт авсн өдгә цага бәәдлд эн йовдл тер дарунь тарҗ, олн улсиг күүндврт орлцулв. Әмтнә уханд оршго йовдл һарһҗах әмтн бәәдгинь үзҗ, тедниг бурушаҗ чик седклтә улс хаҗһр йовдлыг бурушав.
Йосна халхас чигн тиим йовдл бурушагдсна тускар мана «Хальмг үнн» газетд бичгдлә.
Бурхна дүртә, шаҗна әрүн зургуд хурлмудт болн оюни үүлдвртә бәәрнд хадһлгдх зөвтә гисн тоолвран Хальмг Таңһчин Улсин Хуралын (Парламентин) ахлач Артем Михайлов эн йовдлыг эс таассан медүлв. Олн келн-улс ни-негн бәәх орн-нутгт иим йовдлла эвцлдҗ болшго гиҗ парламентин ахлач темдглв.
Әрәсән сүзгтнрин оюни төвин ахлач гевш Йонтен гелң эн йовдлыг бурушаһад, бурхн-шаҗнд шүтдг әмтнә итклинь бацсн йовдл, тиим эд-тавр хулддгинь уурулхин төлә цугнь кегдх гиҗ гевш Йонтен иткүлв.
Хальмгин Шаҗн Лам гевш Тензин Чойдак таңһчин прокурор Виталий Семенченкола харһҗ (зургт), эн төрәр күүндв. Лавкст болн маркетплейст бурхн-шаҗнд иткдг әмтнә итклинь бацҗах тиим эд-тавр хулдҗах бүрткҗ, шиидвр автха гисн эрлһ орулҗахан Хальмгин Шаҗн Лам медүлв. Барин һарцст болн интернетд өргнәр тархагдсн эн му зәңгин тускар күүндәд, прокурор болн Шаҗн Лам эн йовдлла эвцлдҗ болшго гисн тоолврарн хувалцв. Учрсн йовдлын туст прокурорск шинҗллт кех даалһвр Виталий Семенченко көдләчнртән өгв. «Иим күн биш йовдл һарһҗах әмтн мадн дунд бәәхнь, йир һундлта. Өвкнрин, эк-эцкнрин шүтдг шаҗна тускар, орн-нутгт хамдан бәәх улсин шаҗна һол учр-утхинь меддго әмтн тиигҗ үүлдҗәхнь һундлта йовдл» – гиҗ Шаҗн Лам тоолҗана. Эн йовдлын туст цуг кергтә бүртклһ кеҗ, ирлцңгү шиидвр авгдх гиҗ прокурор иткүлв.
Эн йовдлын тускар дав деер кегдсн ашлврар иим болҗана. «Леман ПРО» гидг компань әмтнә неквриг тоод авсн бәәдлтә. Тер өдрин бийднь тер эд-тавр хулдлһнас авгдв. Маркетплейст чигн заагддган уурад, хулдгддган урсинь талдан һазрт йовх Хальмгин әмтн герчлҗәнә. Келхәс, Сочид амрчасн хальмгудын зәңглсәр, ниигмин сүлҗәнд әмтнә олн буцлтта соңсхврмуд умшсн компаня һардвр тер эд-тавриг хулддган уурч.
Бурятин, Туван сүзгтнр шаҗнд шүтдг әмтнә итклинь бацҗах йовдлыг бурушаҗ, орн-нутгин лавкст тиим эд-тавр хулдлһиг уурултха, гиҗ некчәнә.
Иим тоолвр уга йовдлмудыг цаглань чик үнлһ өгч ууруллһн ода цуг улсин керг болҗана. Әмтнә ни-төвкнүн җирһлд харшлҗах тоот тер дарунь уга кегдх зөвтә.

ХӨӨЧИН Галина