Көлгнә төрәр ик хург

Давсн долан хонгт Хальмг Таңһчин Улсин Хуралын (Парламентин) Ахлач Артем Михайлов Беларусь Республикд көдлмшин кергәр йовна.
Минск балһснд «Белорусск көлгнә долан хонг» гидг ик хургт Әрәсән, Азербайджана, Казахстана, Узбекистана көлгн-күчнә бүрдәцсин һардачнр, мана орн-нутгин регионмудын парламентсин болн залврмудын, Беларусин, Әрәсән болн Китдин көлгнә ик сурһульмудын элчнр орлцҗана. Хальмг Таңһчин делегацин ханьд Артем Михайловас нань Хальмг Таңһчин залврин Ахлачин дарук- таңһчин тосхлтын, көлгн-күчнә болн хаалһин эдл-ахун министр Алексей Соколов, Хальмг Таңһчин Толһачин селвгч Салыка Владимир болн таңһчин Улсин Хуралын Ахлачин нөкд Беднән Мергн орв.
«Белорусск көлгнә долан хонг» гидг ик хургин йовудт «Транспорт и логистика» болн «Е-Транс» өдгә цага көлгн-күчнә һәәхүл, олн зүсн харһлтс, селвлцән болв. Һәәхүлд өдгә цага көлгн болн кергсл, тосхлтын, ясврин болн теткврин халхд олзлгддг эв-арһс үзүлгдв. Көлгнә төрәр болсн селвлцәнд, «төгрг ширән» сүүрт, номин-дамшлтын хургт әмтиг болн аца зөөлһнә, хаалһст әәмшг уга бәәдл тетклһнә болн нань чигн чинртә төрмүдәр өргн күүндвр болв.
Көлгн-күчнә нарт-делкән ик хург Беларусьд 2007 җиләс авн давулгдҗана. Терүнд Беларусь болн талдан орн-нутгуд хоорнд көлгн-күчнә залһлда делгрүллһнә, шин эв-арһс олзллһна, көлгнә халхар инвестормудыг соньмсуллһна, әмтиг болн аца зөөлһнә туслмҗиг ясруллһна төрмүд босхгдна.