Цергллтин өөнд нерәдәд

15-10-2024, 10:28 | Общество, Таңһчин зәңгс, Зіњг

Хальмг Таңһчин Улсин Хуралын (Парламентин) Ахлачин даалһврар депутат Эльдән Виктор зарһин-медицинск шинҗллтин таңһчин бюрон 65 җилин өөнд нерәдгдсн байрин хургт орлцв. Таңһчин зака үүдәгч бүрдәцин болн эврәннь нерн деерәс СМЭ-н цергллтин көдләчнриг йөрәһәд, дааврта болн нәрн көдлмштнь күцәмҗ дурдв.

Таңһчин Улсин Хуралын Ахлач Артем Михайлов илгәсн йөрәлин бичгт бүрдәцин мергҗлтнрин көдлмш өөдәнәр үнлгдҗ, цергллтин делгрлтд тәвцән орулсн ветеранмудын ач-тус темдглгдҗәнә. «Зарһин-медицинск шинҗллтин бюрон көдләчнр өдр-сө, теңгрин бәәдл ямаран гиҗ хәләлго мөңшкәчнрлә хамдан зеткр учрсн һазрур һарч йовхдан белн бәәнә. Тана цергллтин көдләчнрин өдр-бүрин, дааврта үүлдвр зөв-йос харлһна бүрдәцсин көдлмшт ик чинр зүүнә», гиҗ йөрәлин бичгт келгдҗәнә.
Олн җилдән үнн-чик седклтәһәр көдлҗ, цергллтин делгрлтд ик тәвцән орулсн Ирина Зереева, Нарна Гилән, Татьяна Пилипянко, Энән Балҗр болн Явашкан Айса Хальмг Таңһчин Улсин Хуралын (Парламентин) Ахлачин Ханлтын бичгәр ачлгдв.
БАТАН Сәәхлә

Видео