Хальмгин депутатнрин седвәриг дөңнв

Шидр Ростов-на-Дону балһснд Әрәсән Өмн үзгин Парламентск Ассоциацин (ЮРПА) дарани хург болв. Хальмг Таңһчин Улсин Хуралын (Парламентин) Ахлач Артем Михайлов һардсн делегацин ханьд энүнә дарукс Бадмин Вячеслав, Нуура Николай, депутатнр Болдра Валерий, Җаңган Чимид, Никитинә Айс, Кокан Михаил, Саңһҗин Лаг, Цекрә Зулта болн Эрднин Гилән орв. Хойр өдрин эргцд Әрәсән Өмн үзгин регионмудын зака үүдәгч бүрдәцсин элчнр олн зүсн керг-үүлдвр, харһлтс давулҗ, чинртә төрмүдәр өргн күүндвр кев.


Түрүн өдр таңһчин Улсин Хуралын Ахлач Артем Михайлов наадк делегацсин һардачнрла хамдан Тең һолын ус цеврллһнә төсвин йовудт күцәгдҗәдг керг-үүлдврлә таньлдад, тосхгдҗах Багаевск усна тогталд одв. 2021 җилд Ростовск болн Аһшин мүҗсин седвәрәр Тең һолын эдл-ахун халх делгрүллһнә болн шинрүллһнә көтлвр батлгдсн билә. Эднә седвәриг Әрәсән Президент болн Федерацин Хүүв дөңнәд, шишлң көтлвр батлсмн. Ростовск мүҗд һолын усн ут тоодан 90 дуунад цеврлгдв, Тең һолын цувгин ясврин көдлмш ода гүргүдән орсн бәәнә, түрүн девсңгинь 2025 җилин мөрн сард төгсәхәр зуралҗана.
Таңһчин Улсин Хуралын Ахлачин дарукс Бадмин Вячеслав болн Нуура Николай, депутатнр Болдра Валерий, Җаңган Чимид, Никитинә Айс, Кокан Михаил, Саңһҗин Лаг, Цекрә Зулта болн Эрднән Гилән ЮРПА-н комитетмүдин болн комиссьмүдин сүүрт орлцад, шаңһа йосна бүрдәцсин хайгар орулгдх закадын седвәрмүдәр болсн күүндврт сүв-селвгән орулҗ, ухан-тоолврарн хувалцв. Хальмгин депутатнр дөрвн төрәр седвәр татв. Тиигәд, таңһчин Улсин Хуралын Ахлачин дарук Нуура Николай Әрәсән залврин Ахлач Михаил Мишустинә нернд «Земск тренер» гидг шаңһа көтлвр белдлһнә туск дуудврин тускар келв. Энүнәс нань манахс Әрәсән селәнә эдл-ахун министр Оксана Лутд бас хойр дуудвр белдв. Депутат Кокан Михаил селәнә эдл-ахун төлә ик чинр зүүҗәдг тәрәнә экин чинрин болн буудян әәмшг уга бәәдлин туск төрмүд босхв. Эрднин Гилән Әрәсән Орн-нутгин Хүүвин Ахлач Вячеслав Володинә нернд РФ-н субъектмүдин түүмрәс саглуллһна цергллтст баһ гиснь 25 җилдән көдлсн әмтнд цаг-болзгасн урд пенсьт һарх зөв өгхин туск седвәр орулгдҗахин тускар зәңглв. Хальмгин депутатнрин орулгдсн седвәрмүдиг хургт орлцачнр дөңнәд, ЮРПА-н шиидврт орулх болв.
Әрәсән Өмн үзгин Парламентск Ассоциацин ханьд Донецк болн Луганск Улсин Республикүдин Улсин, Херсонск мүҗин Хүүвиг, Запорожск мүҗин зака үүдәгч Хургиг орулснь темдгтә йовдл болв. ЮРПА-н ханьд орсн шин гешүдт ирлцңгү дамшлт хоршах кергтә. Ассоциацин ханьд урдк кевәрн Өмн үзгин федеральн округин нәәмн зака үүдәгч хург орна, дәкәд йисн субъектин элчнр дамшлтын гешүд болҗ үүлднә.
ЮРПА-н дарани хург болхла Краснодар балһснд болхмн.
ДООҖАН Наталья