Баатрмудын нерд мөңкрүлгдх

Хальмг Таңһчд 110-ч онц Хальмг мөрн дивизин дәәчнрт бумб тәвхәр шиидсмн. Элст балһсна хургин медлд үүлддг сойлын-тууҗин зөөрин төриг хаһлдг комиссин дарани сүүр деер тер бумбин тускар күүндвр кегдҗ, бумбин цаг-зуурин зурц болн терүг босххин ормин тускар селвлцв. Бумбин зурциг Әрәсән ачта архитектор Шалан Сергей белдсмн. Баатрмудын аллейин өөр эргнд бумбиг тәвх кергтә гиҗ зуралгдҗана.

Төрскән харсгч Алдр дәәнд бәрсн Диилврин 80 җилин өөнд нерәдҗ, нер туурсн Хальмг эн дивизин дәәчнрин зөрмг үүлдвриг темдгллһн ик чинртә болҗана. Дивизиг бүрдәлһнд Ока Иванович Городовиков шунҗ үүлдсинь зааһад, дивизь дәәнә җилмүдт Сталинградск дәәлдәнд белдҗ, тенд диилвр бәрлһнд ик тусан күргсинь темдгләд, бумб балһсна төвд босхгдх зөвтә гиҗ Элст балһсна Хургин Толһач Максим Сорокин комиссин сүүрт келв.
Эн сүүрт нань чигн төрмүдәр күүндвр болв. Келхәс, СВО-н орлцачнрин зургуд үзүлгдлһнә төр хаһлгдв. Төрскән харсгч Алдр дәәнд залу-зөргәрн ончрсн баатрмудын зургуд иргчдән хотл балһснд углҗ тәвгдхмн. «Баатрмудын нердиг мөңкрүллһн - мана һол төрмүдин негнь, - гиҗ балһсна һардач тоолҗана. - Төрскнәннь төлә әмән әрвллго дәәлдсн баатрмудын, таңһчан туурулсн улсин нерд мартгдх зөв уга. Иргч үйнрин төлә теднә туск санлыг хадһлхмн!» – гиҗ Максим Сорокин сүүрт орлцачнриг иткүлв.