«Көк теңгсин наадн» күцәмҗтә болв

Хулһн сарин 7-с авн 12 күртл Әәдрхн балһснд «Көк теңгсин наадн» («Игры Каспия») гидг нертә оютнрин спортын нарт-делкән VII марһан болв. Энүнә бүрдәһәчнрин тоод Әрәсән спортын министерств, Әәдрхнә мүҗин залвр, эн мүҗин спортын болн тамрин сойлын министерств, «Спорт норма жизни» гидг федеральн төсв, Көң теңгсин көвән ик сурһульмудын болн номин шинҗллтин күрәлңгсин негдлт, Әәдрхнә шаңһа техникин ик сурһуль орв.

Көк теңгсин көвән ик сурһульмудын нарт делкән спортын наадд 2000 җиләс авн бүрдәгдҗәнә. Әәдрхнә мүҗин һазрт эн нарт делкән марһан һурвдад болҗана. Урднь 2000 болн 2007 җилмүдт оютнрин наадн болсмн. Марһанд Әрәсән, Казахстана, Ирана, Азербайджана, Туркменистана командс болн Әәдрхнә вузмудт сурчах Африкин орн-нутгудын оютнр бас чидлән сөрв.
Хальмг ик сурһулин командын ханьд 56 күн орв, эдн футболын, баскетболын, волейболын, самбо бөк бәрлдән, шатрин, дөөвин, фиджитал-футболын болн фиджитал-волейболын марһаст мергҗлтән үзүлх.
Тер мет гиигн атлетикин, өөмлһнә, самбон марһан нарт делкән наадна көтлврт бас орв. Аштнь хальмг оютнр нааднд ирсн 14 команд дунд ончта 5-ч орм эзлв. Марһана цуг зүснд эдн йилһрв. Хамгин түрүнд Хальмг ик сурһулин күүкд улсин волейболын командыг темдглх кергтә. Цуг дөрлдәнә йовудт олн харһлтд диилвр бәрәд, финалд күрәд эдн аштнь түрүн орм эзлв. Залу улс теднәс невчк ард хоцрад, күрл мөңгнә медаль авв. Шатрин марһанд хальмг оютнрин команд нүүрлгч хойрдгч орм эзлв.
Командсин ханьд сәәнәр дөрлдсн деерән зәрм оютнр онц сән ашан чигн үзүлв. Тер тоод дөөвәр һурвдгч ормиг Баина Бадмаева эзлв. Түүнә өмн талдан зүсәр марһан болв, Хальмг ик сурһулин элчнр энд бас му биш аш үзүлв. Самбо бөк дөрлдәнд мана таңһчиг Максим Кабутов ончта кевәр элчлҗ 2-ч орм эзлв. Тер мет хәәвдлһнә (гребля) дөрлдәнд Дмитрий Сюкиев цаһан мөңгнә медаляр ачлгдв.
– Мана оютнр Көк теңгсин көвән орн-нутгудын ик сурһульмудын нааднд урдаснь белдҗәлә, тегәд чигн эдн сән ашан үзүлв. Мана хальмг вуз негдлтин номин болн сойлын, спортын керг-үүлдврт шунлттаһар орлцҗ залһлдаһан батрулҗ йовнавидн. Әрәсән, Казахстана, Азербайджана вузмудла хәрлцәһән өргҗүлҗәнәвидн, тернь хамцу номин көдлмш күцәлһнд ик нилчән күргҗәнә, – гиҗ Хальмг ик сурһулин һардач Салан Бадм тоолвран келв.
Эн нааднд чигн хальмг оютнр сән белдврән үзүлҗ негдлтд орҗах вузмудын җисәг делгрүлҗ, эдн хоорнд иньгллтин, хоорндан нөкцлтлһнә хәрлцәг өргҗүлҗәнә.

ҖААХАН Бадм