Баахн залун әм аврв

Городовиковск районд бәәдг Иван Касьянов хаалһд учрсн зеткртә йовдлд, күнд шав авсна ашт П.Жемчуевин нертә таңһчин эмнлһнд тусв.
Таңһчин эмнлһнә әңгин эмчнр энүнд зурһан часин алднд месллһ кеһәд, олн зүсн эв-арһ олзлҗ әминь аврв. Түрүн месллһнә хөөн эрүл-менднь невчк батрхла, энүнд дәкәд нег месллһ кеһәд, төмр кегдлмүд олзлҗ сүҗин ясинь ясв. «Остеосинтез гидг месллһнә хөөн шавта күн босад, эврән йовҗ чадна. Зеткрин ашт авсн эн шав хамгин күнд гиҗ тоолдгна, тегәд эн месллһиг цаглань кех кергтә. Мана эмнлһнд энүнд сән чинртә дөң күргв, ода эн герүрн хәрв, иргчдән энүнд цогц-махмудан батруллһна керг-үүлдврмүд күцәгдхмн», – гиҗ эмнлһнә эмч Цевгә Хоңһр келв.
Таңһчин эмнлһнә эмчнр остеосинтез гидг месллһиг сүл җилмүдт күцәмҗтәһәр кеҗәнә. Нидн эдн тиим 15 месллһ кев, эн җилин эклцәс авн 20 күүнд дөң болв. Әңгин һардач Болдра Олегин келсәр, хам-хоша бәәдг регионмудын эмнлһсин мергҗлтнр эн месллһн нүүрлгч номин-шинҗллтин күрәлңгин кемҗәнлә ирлцҗәнә. Мана эмнлһнд өөдән мергҗлттә болн дамшлтта эмчнр болн өдгә цага кергсл бәәхнь тиим чинртә дөң күргхд туслна.
- Түрүн месллһнә хөөн көвүм әрә көндрдг билә, хойрдгч месллһ кеснә хөөн эн эврән суудг болв. Мана эмч Хоңһр Владимирович көвүндм урмд өгч, бүлән үгәрн чигн эдгәнә. Көвүм эрк биш көл деерән босад йовдг болх гиҗ иткл өгв. Өрәл җил давад, көвүм эврән ишкәд йовдг болхмн гиҗ эмчнр келнә. Эн әңгин цуг көдләчнрт бидн ик ханлтан өргҗ, эднә цаһан седкл болн килмҗ маднд ик чидл урһана, –гиҗ Иван Касьяновин экнь Людмила келнә.
ДООҖАН Наталья
ЗУРГТ: күнд шав авсн залуд месллһ кеҗәх кем